Փաստ ինֆո

Երեկ իշխանական ԶԼՄ-ները խոսեցին գերիների վերադարձի մասին, փորձեցին այդ թեմայով PR անել։ Լրագրողների հետ զրույցի ժամանակ այս մասին ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը։

«Անգամ եթե սպասել են, որ պետք է ռազմագերիներ վերադարձվեն, երբ ինքնաթիռն այնտեղից դուրս է գալիս, հայկական ծառայություններն իմանում են՝ քանի մարդ է գալիս։ Եթե գիտեին, որ նման բան չկա, իսկ ես վստահ եմ, որ գիտեին, նման տեղեկատվություն տալ և հանրությանը նման ձևով սթրեսի մեջ գցել, չէր կարելի։ Սա իշխանության հերթական փնթի, ապաշնորհ պահվածքի արդյունք է, որը համատեղվում է նման տրագեդիայի վրա PR անելով»,-ասաց Էդմոն Մարուքյանը։

Անդրադառնալով շրջանառվող այն լուրերին, որ այս ամենն արվում է Մեղրիից հանրության ուշադրությունը շեղելու համար, Էդմոն Մարուքյանն ասաց, որ նման տեղեկություն չունի. «Մեղրիում հարց չկա լուծելու, որ այդ հարցը պետք է լուծել։ Հայաստանի որևէ կետում հարց չկա լուծելու և կարծում եմ՝ չպետք է այդ լուրերին տեղի տանք։ Հանկարծ, եթե նման պրոցես լինի, բոլորով դա պետք է թույլ չտանք, բայց նման բան չեմ տեսնում»,-ասաց պատգամավորը։

Վերջինս նշեց, որ այս պահին Հայաստանին պետք է իշխանություն, որը կկարողանա մի քիչ ուղղել իր մեջքը, որ եթե ինչ-որ բան են պայմանավորվել և այն չի կատարվել, արձագանքեն դրան. «Վախեցած երկրի ներսում գոռգոռալ, խոսալ չի ստացվելու»,-նշեց Էդմոն Մարուքյանը։

Աղբյուր` Փաստինֆո