Փաստ ինֆո

Գերեվարված շիրակցի զինծառայողների ծնողներն ու հարազատները, որոնք փակ են պահում Գյումրի-Երևան մայրուղին, այսօր վարչապետին չեն հանդիպի: Ավելի վաղ գերիներից մեկի հարազատը նշել էր, որ ճանապարհը կբացեն միայն իրենց հարազատների վերադարձի մասին ստույգ ու սպառիչ տեղեկություն ստանալուց հետո:

Շիրակի մարզից գերիների հարազատները «Փաստինֆո»-ի հետ զրույցում դիմել էին ՀՀ վարչապետին, Պաշպանության նախարարին և Արտաքին գործերի նախարարին, ՌՈ պետին, ԱԺ բոլոր պատգամավորներին՝ շուտափույթ զբաղվել գերիներին վերադարձնելու հարցով։

ԱԺ պատգամավոր Սոֆյա Հովսեփյանն այսօր ՊՆ-ի մոտ լրագրողների հետ զրույցում տեղեկացրեց, որ ամբողջ Շիրակի մարզը պարալիզացված է, գերեվարված զինծառայողների ծնողները պահանջում են հանդիպում՝ Նիկոլ Փաշինյանի հետ, իսկ այժմ նախատեսված է հանդիպում՝ ԱԱԾ տնօրենի հետ։

Գերեվարված զինծառայողների հարազատներից մեկը «Փաստինֆո»-ին տեղեկացրեց, որ Փաշինյանի հետ հանդիպում այսօր չի լինելու, չնայած ավելի վաղ պայմանավորվել էին, որ ապրիլի 9-ին Նիկոլ Փաշինյանն ընդունելու է զինծառայողների հարազատներին։ Նախօրոք պայմանավորված հանդիպման ժամը մի քանի անգամ փոխվել է։

Ըստ տեղեկությունների՝ այսօր 17։00-ից հետո վարչապետը պետք է ընդուներ հարազատներին, սակայն, երբ զինծառայողների հարազատները արհամարհական վերաբերմունքի են արժանացել, առավոտյան Շիրակի մարզ տանող ճանապարհներն են փակել՝ պահանջելով, որ վարչապետը մեկնի Շիրակ ու այնտեղ տեղի ունենա հանդիպումը։

Հիշեցնենք, որ իրավիճակը սրվեց երեկվանից, երբ «Էրեբունի» օդանավակայանում գերիների խմբին սպասող ծնողներին հայտնեցին, որ Բաքվից դատարկ ինքնաթիռ է ժամանել, ինչից հետո գերեվարված զինծառայողների հարազատները ուշ գիշերին եղել են կառավարության շենքի մոտ, հանդիպում են պահանջել վարչապետի հետ, սակայն ոչ ոք նրանց կառավարությունից չի ընդունել։

Աղբյուր` Փաստինֆո