Փաստ ինֆո

Մեղրիում իրավիճակը հանգիստ չէ, մտավախություն կա, որ Մեղրիի հետ կապված կարող են տեղի ունենալ ինչ-որ գործողություններ։ Այս մասին «Փաստինֆո»-ի հետ զրույցում ասաց Մեղրի համայնքի ղեկավար Մխիթար Զաքարյանը՝ նշելով, որ առայժմ առարկայական ոչ մի բան չեն նկատել։

Ինչպես արդեն հայտնել ենք, երեկ իշխանական խողովակներով տեղեկատվություն էր տարածվել առ այն, որ Երեւան է տեղափոխվելու հայ ռազմագերիների հերթական խումբը, սակայն ինքնաթիռի ժամանումից հետո պարզ դարձավ, որ որեւէ ռազմագերի չի տեղափոխվել, քանի որ օդանավում եղել է միայն ռուսական խաղաղապահ զորքերի հրամանատար Ռուստամ Մուրադովը:

Գերեվարված հայորդիների հուսախաբված ծնողներն այսօր փակել էին Երեւան-Գյումրի մայրուղին, իսկ անհետ կորած զինվորների ծնողներն արգելափակել էին ՊՆ-ի բոլոր մուտքերն ու ելքերը։

Որոշ պատգամավորներ, մասնավորապես ԲՀԿ պատգամավոր Նաիրա Զոհրաբյանը, մտավախություն հայտնեց, որ այս ամենն արվում է Մեղրիի հետ կապված որոշ գործողություններից հանրության ուշադրությունը շեղելու համար.

«Տարբեր խոսակցություններ կան, որ այս ամենն արվում է ինչ-որ չափով շեղելու ուշադրությունը Մեղրիում չափագրումների խնդրից»,-ասել էր Զոհրաբյանը և հորդորել Մեղրիի համայնքապետ Մխիթար Զաքարյանին զգոն լինել և վտանգի դեպքում ահազանգել:

Այս առիթով «Փաստինֆո»-ն կապ հաստատեց Մեղրիի համայնքապետի հետ՝ պարզելու ի՞նչ վիճակ է Մեղրիում և արդյո՞ք ինքը նկատել է որևէ գործընթաց.

«Մենք էլ ձեզ նման մամուլից ենք լսում նման բաներ, իմ կարծիքով, դա ենթադրություն է, եթե փաստեր ունեն, ճիշտ կլինի ավելի առարկայական ներկայացնեն: Գուցե դա իրենց մտավախությունն է՝ հիմնավոր կամ անհիմն: Իրենք իրավունք ունեն իրենց մտավախություն հայտնելու, բայց մինչև փաստ չլինի չեմ կարող ոչինչ ասել»,-մեզ հետ զրույցում ասել է Զաքարյանը և ավելացրել. «փաստացի ոչինչ չենք նկատել, բայց մտավախություն անընդհատ կա, ցավոք սրտի, ոչ մեկն էլ չի հերքում, այդ անհանգստությունն ավելի շատ գալիս է մեր իշխանության կրավորական կեցվածքից, ոչ հերքում են, ոչ հաստատում են, ոչ էլ հիմնավոր գործողությունների ծրագիր են ներկայացնում, ինֆորմացիոն վակուումն է անհանգստության տեղիք տալիս»:

Աղբյուր` Փաստինֆո