Փաստ ինֆո

Կառավարությունն այսօրվա նիստում քննարկեց և հավանություն տվեց «Բաժնետիրական ընկերությունների» մասին օրենքում և հարակից օրենքում փոփոխություններ և լրացումներ կատարելու մասին նախագծին: Նախագիծը ներկայացրեց ԱՆ նախարար Ռուստամ Բադասյանը.

«Բաժնետիրական ընկերությունների մասին օրենքի մի շարք կարգավորումներ ներկայումս համահունչ չեն գործարար աշխարհում տեղի ունեցող զարգացումներին, որոնք իրենց ազդեցությունն են ունենում նաև կորպորատիվ հարաբերությունների զարգացման վրա: Բաժնետիրական ընկերությունների մասին նախագիծը, որը հիմնարար փոփոխություններ է ենթադրում ոլորտում և դրական ազդեցություն կարող է ունենալ ներդրումային միջավայրի վրա»,-ասաց Ռուստամ Բադասյանը:

Նախարարը նշեց, որ նախագծով առաջարկվում է թույլատրել տարբեր դասերի հասարակ բաժնետոմսերի թողարկումը.

«Ներկայումս ունենք հասարակ և արտոնյալ բաժնետոմսեր: Արտոնյալի հիմնական էությունն այն է որ չեն ունենում քվեարկելու իրավունք ընկերությունում, փոխարենը՝ ավելի լայն հնարավորություններ են ընձեռնվում շահաբաժին ստանալիս կամ ընկերության լուծարման շրջանում ավելի առաջնային է իրենց պահանջների բավարարումը»,-ասաց ԱՆ նախարարը:

Նախագծով որոշակի դասի սովորական բաժնետոմսը կարող է ավելի շատ քվեարկելու հնարավորություն ընձեռի, իսկ մեկ այլ դասի բաժնետոմս քիչ մասնակցի ընկերության կառավարմանը, բայց ավելի շահաբաժին ստանալու լայն հնարավորություն ունենա:

Նախագծով միևնույն ժամանակ սահմանափակվում է, որ միևնույն դասի բաժնետոմսով առավելագույն քվեարկելու իրավունքը 10 ձայն կհամարվի սեփականատիրոջ համար:

Նախագծով առաջարկվում է նաև ազատականացնել խոշոր գործարքների վերաբերյալ կարգավորումները:

Ռուստամ Բադասյանը նաև նշեց, որ նախագծով փոփոխություններ են նախատեսվում նաեւ աշխատակիցների բաժնետիրացման մասով. «Նախագծով նախատեսվում է ներդնել աշխատակիցների բաժնետիրացման ժամանակակից եւ գործուն մոտեցումներ:

Այսինքն հնարավորություն ենք տալիս, որ գործատուն իր աշխատակցին կարողանա արտոնյալ պայմաններով բաժնետոմս տալ՝ կանխելով նրա հեռանալը»,-ասաց Բադասյանը:

Աղբյուր` Փաստինֆո