Փաստ ինֆո

ՀՀ երկրորդ նախագահ Ռոբերտ Քոչարյանը նոր հայցադիմում է ներկայացրել՝ ընդդեմ Նիկոլ Փաշինյանի: Հայցադիմումը դատարան մուտք է եղել ապրիլի 7-ին և նույն օրը մակագրվել Երևանի ընդհանուր իրավասության դատարանի դատավոր Արթուր Միշայի Մկրտչյանին:

ՀՀ երկրորդ նախագահ Ռոբերտ Քոչարյանի ներկայացուցիչ Հայկ Ալումյանը «Փաստինֆո»-ի հետ զրույցում հայտնեց, որ հայցադիմումի պատճառը 2021թ մարտի 1-ին Երևանի Հանրապետության հրապարակում հրավիրված հանրահավաքի ընթացքում հնչեցրած արտահայտություններն են, որոնք, իրենց գնահատմամբ, պարունակում են զրպարտություն են և անմեղության կանխավարկածի խախտում:

Հիշեցնենք, որ 2021թ մարտի 1-ին Նիկոլ Փաշինյանը հայտարարել էր, թե 2008 թվականի մարտի 1-ն ահա ժողովրդի իշխանության համար մղվող այդ պայքարի մի կարևոր հանգրվան էր:

«2008 թվականի մարտի 1-ին Հայաստանի այն ժամանակվա կառավարողները բանակը հանեցին ժողովրդի դեմ, Հայաստանի քաղաքացիներին գնդակահարելու որոշում կայացրին: Շատ կարևոր է արձանագրել, որ այս գործով՝ Մարտի 1-ի գործով կան մեղադրվող անձինք, որոնք այսօր կանգնած են դատարանի առաջ: Ու պիտի, այո՛, արձանագրեմ, որ Մարտի 1-ի գործը, ըստ էության, իմ գնահատմամբ, բացահայտված է»,- հայտարարել էր Փաշինյանը:

Փաստաբան Հայկ Ալումյանը տեղեկացրեց, որ դատարանից պահանջում են՝ հաստատել անմեղության կանխավարկածի խախտումը և դրամական փոխհատուցում՝ 4 մլն դրամի չափով:

Նշենք, որ դատարանն արդարացման հիմքով դադարեցրել է ՀՀ քրեական օրենսգրքի 300.1-րդ հոդվածով Ռ.Քոչարյանին առաջադրված մեղադրանքն ու վարույթը կարճել։

Աղբյուր` Փաստինֆո