Փաստ ինֆո

ԿԳՄՍ նախկին փոխնախարար Գևորգ Լոռեցյանի և մյուսների գործով քրեական գործի վարույթը չի կարճվի: «Փաստինֆո»-ի հաղորդմամբ՝ Երևանի ընդհանուր իրավասության դատարանում՝ դատավոր Արտուշ Գաբրիելյանի նախագահությամբ, Գևորգ Լոռեցյանի և մյուսների վերաբերյալ գործով դատական նիստին Էդուարդ Հովհաննիսյանի պաշտպանը միջնորդություն է ներկայացրել դատարան՝ իր պաշտպանյալի նկատմամբ քրեական հետապնդումը դադարեցնելու և քրեական գործի վարույթը կարճելու մասին՝ հանցադեպի բացակայության հիմքով:

Նշենք, որ Հովհաննիսյանը մեղադրվում է Լոռեցյանի կողմից կաշառք ստանալուն օժանդակելու մեջ, մինչդեռ՝ Հովհաննիսյանի փաստաբանը գտնում է, որ Լոռեցյանին վերագրվող արարքը չի համապատասխանում առաջադրված մեղադրանքի դիսպոզիցիային, այսինքն՝ արարքի իրավաբանական որակումը չի համապատասխանում նկարագրված արարքի բնույթին: Փաստաբանի դիտարկմամբ՝ այդ պարագայում գործը դատական քննության նախապատրաստելիս դատարանը պարտավոր էր վերադարձնել գործը և քանի որ դա չի արվել սահմանված ժամկետներում և ակնհայտ է, որ արարքի իրավաբանական որակումը չի համապատասխանում նկարագրված արարքի բնույթին, միջնորդում է կարճել գործի վարույթը և դադարեցնել քրեական հետապնդումը՝ հանցադեպի բացակայության հիմքով: Մեղադրող դատախազ Գևորգ Սարգսյանն առարկեց՝ նշելով, որ միջնորդությունն անհիմն է և ենթակա է մերժման: Ավելին՝ դատախազը նկատեց, որ ներկայացված միջնորդությունը նաև ժամանակավրեպ է:

Շուրջ մեկ ժամ խորհրդակցական սենյակում մնալուց հետո նախագահող դատավորը հրապարակեց որոշումը՝ մերժելով պաշտպանի միջնորդությունը:

Թեև Գևորգ Լոռեցյանի պաշտպան Լևոն Սահակյանը հայտարարեց, որ միջնորդություն է մուտքագրել աշխատակազմ՝ Լոռեցյանի խափանման միջոցի փոփոխման վերաբերյալ, դատարանը որոշեց հետաձգել դատական նիստը՝ աշխատանքային ժամի ավարտով պայմանավորված; Դատական նիստը կշարունակվի ապրիլի 14-ին:

Ինչպես արդեն տեղեկացրել ենք՝ ԿԳՄՍ նախկին փոխնախարար Գևորգ Լոռեցյանը կալանքի տակ է 2019թ դեկտեմբեր ամսից։ Գևորգ Լոռեցյանին մեղադրանք է առաջադրվել այն բանի համար, որ նա «Լաուռ» և «Էլիտ Սպորտ» առևտրային կազմակերպությունների սեփականատեր և գործադիր տնօրեն Հրաչիկ Քանանյանից պահանջել է առանձնապես խոշոր չափերով՝ 2․000․000 ՀՀ դրամ կաշառք իր կողմից ընդհանուր հովանավորչության, Հ․ Քանանյանի ներկայացրած առևտրային կազմակերպությունների կողմից ՀՀ ԿԳՄՍ նախարարության կազմակերպած գնման գործընթացներին մասնակցության և դրանցում հաղթելու դեպքում մատակարարվող ապրանքներն ընդունելիս խոչընդոտներ չստեղծելու և հնարավոր խնդիրներից զերծ պահելու համար։ Նշենք, որ սույն գործով մեղադրյալները երեքն են։

Հրաչիկ Քանանյանին մեղադրանք է առաջադրվել այն բանի համար, որ նա հանդիսանալով «Լուառ» և «Էլիտ Սպիրտ» առևտրային կազմակերպությունների սեփականատեր և գործադիր տնօրեն, ՀՀ կրթության, գիտության, մշակույթի և սպորտի նախարարի տեղակալ՝ գործադիր իշխանության մարմնի ղեկավար աշխատող և պաշտոնատար անձ հանդիսացող Գևորգ Լոռեցյանին խոստացել է տալ առանձնապես խոշոր չափերով՝ 2․000․000 ՀՀ դրամ կաշառք՝ նրա կողմից ընդհանուր հովանավորչության, իր ներկայացրած առևտրային կազմակերպությունների կողմից ԿԳՄՍ նախարարության կազմակերպած գնման գործընթացներին մասնակցության և դրանցում հաղթելու դեպքում մատակարարվող ապրանքներն ընդունելիս խոչընդոտներ չստեղծելու և հնարավոր խնդիրներից զերծ պահելու համար։

Հեղինակ՝ Իզաբել Սահակյան

Աղբյուր` Փաստինֆո