Փաստ ինֆո

Մենք առաջարկել ենք, որ նախագահի աշխատակազմից մշտապես մասնակցեն մեր նիստերին։ Այս մասին ԱԺ տնտեսական հարցերի հանձնաժողովի նիստի ժամանակ ասաց հանձնաժողովի նախագահ Բաբկեն Թունյանը։

«Եղել են դեպքեր, երբ օրենքները քննարկել ենք, ընդունվել են հետո նախագահի ստորագրման ժամանակ որոշ մտահոգություններ են հնչել։ Դրանից հետո առաջարկել ենք, որ նախագահի աշխատակազմից մշտապես մասնակցեն մեր նիստերին, և եթե կան մտահոգություններ հենց հանձնաժողովի նիստերի ժամանակ այդ մասին հնչեցվի։ Այդ հրավերը միշտ ուղարկում ենք։

Վերջերս ՏՄՊՊՀ-ի մասին օրենքում փոփոխություններ կատարելիս նախագահի գրասենյակը նույնպես որոշ մտահոգություններ էր արտահայտել, ըստ այդմ կրկնում եմ իմ առաջարկը. Մասնակցել հանձնաժողովի նիստերին և եթե կան մտահոգիչ հարցեր, տեղում դրանք բարձրացնել, որպեսզի ստորագրման փուլում որոշ դիտարկումներ արվեն ու այնպիսի տպավորություն ստեղծվի, որ ԱԺ-ում հարցերը պատշաճ կերպով չեն քննարկվում»,-նշեց պատգամավորը։

Բաբկեն Թունյանը նկատեց՝ քանի որ ԱԺ-ն ոչ միայն օրենսդրական նախագծեր մշակելու, ընդունելու համար նախատեսված մարմին է, այլև հաղորդակցության և քաղաքականության մարմին, անդրադարձավ նախօրեին ՀՀ նախկին վարչապետ Հրանտ Բագրատյանի ելույթին.

«Հանրահավաքի ժամանակ Հրանտ Բագրատյանը նշել է, որ հրապարակվել են Նիկոլ Փաշինյանի, ԱԺ նախագահ Արարատ Միրզոյանի 2020թ.-ի եկամուտները և յուրաքանչյուրինը կազմում է 60 հազար դոլար։ Նա նաև ասել է, որ ամեն ամիս ԱԺ նախագահին և պատգամավորներին պարգևավճար են տալիս։ Անցած տարի միայն դրա համար 120 մլն դոլար է ծախսվել, որով 2000 հատ փոքր ԱԹՍ կարող էինք գնել։

Ուզում եմ ասել, որ այս բոլոր պնդումները սուտ են։ ԱԺ նախագահի, վարչապետի եկամուտների մասին տվյալները դեռ չեն հրապարակվել, իսկ հրապարակված տվյալներով նման ինֆորմացիա չկա։ 120 մլն դոլար պարգևավճար պետական համակարգում 2020-ին չի եղել։ Եթե Հրանտ Բագրատյանն ապացուցեց, որ անցյալ տարի 120 մլն դոլար պարգևավճար է բաժանվել, ես ներողություն կխնդրեմ, իսկ եթե չապացուցվեց, ինքը պետք է ներողություն խնդրի»,-նշեց Բաբկեն Թունյանը։

Աղբյուր` Փաստինֆո