Փաստ ինֆո

Դեղերի եվրոպական գործակալությունը հստակ ֆիքսել է, որ AstraZeneca-ով պատվաստման և մահերի անմիջական պատճառի հետ կապն ապացուցված չէ։ Լրագրողների հետ զրույցի ժամանակ այս մասին ասաց ԱԺ առողջապահության և սոցիալական հարցերի հանձնաժողովի նախագահ Նարեկ Զեյնալյանը։

Պատգամավորն ասաց, որ Ռուսաստանի հետ բանակցություններ են ընթանում՝ պատվաստանյութի որոշակի չափաքանակ ձեռք բերելու ուղղությամբ. «2000 չափաբաժին նվիրատվության ձևով տրվել է ՀՀ-ին, որոնք ներարկվել են ռիսկային խմբերի անձանց, այն բժիշկներին, որոնք զբաղվում են կորոնավիրուսով հիվանդների բուժմամբ։ Հիմա բանակցություններ են գնում իրենց պատվաստանյութը ձեռք բերելու ուղղությամբ, միաժամանակ միասնական հարթակի հետ կա պայմանավորվածություն, փոխանցվել է նախնական գումար 800 մլն-ի չափ, որպեսզի այնտեղից ևս տրամադրվեն պատվաստանյութեր։ Իրենք տրամադրելու են Pfizer, AstraZeneca և Moderna ֆիրմաների պատվաստանյութեր»,-ասաց Նարեկ Զեյնալյանը։

Հարցին՝ AstraZeneca-ի հետ կապված մտահոգություններ ունե՞ն, քանի որ բազմաթիվ քաղաքացիներ արդեն չեն ցանկանում դրանով պատվաստվել, պատգամավորն ասաց, որ այս պահին պատվաստումների համար բավականին մեծ պահանջարկ և հերթագրումներ կան։ Նարեկ Զեյնալյանն ընդգծեց, որ ՀՀ-ում որևէ պատվաստում չի եղել և չի լինելու պարտադիր սկզբունքով. «Պատվաստանյութը և պատվաստումն է վիրուսի դեմ պայքարելու միակ լուծումը»,-ասաց պատգամավորը։

Աղբյուր` Փաստինֆո