Փաստ ինֆո

ԱԺ նախկին պատգամավոր Լևոն Սարգսյանին՝ Ալրաղացի Լյովիկին արտահանձնելու, ՀՀ վերադարձնելու միակ նպատակը եղել է նրան «Մարտի 1»-ի գործով նրանից ցուցմունք կորզել ինչ- որ պաշտոնատար անձի վերաբերյալ: Այս մասին Ալրաղացի Լյովիկի գործով դատական նիստին հայտարարել է փաստաբան Աշոտ Սարգսյանը:

Նշենք, որ քրեական գործը գտնվում է ապացույցների հետազոտման փուլում, այժմ դատարանը՝ դատավոր Տաթևիկ Գրիգորյանի նախագահությամբ, ուսումնասիրում է գործում առկա փաստաթղթերը:

Գրավոր ապացույցներից մեկի զննության ժամանակ, որը վերաբերում էր նախաքննության ընթացքում քննիչի հարցմանը՝ կապված Սարգսյանի մասնակցությամբ քննչական գործողություններին, փաստաբան Աշոտ Սարգսյանը հայտարարեց, որ երկու տարվա ընթացքում որևէ քաղաքական հայտարարությամբ հանդես չի եկել, սակայն քննիչն ինքն է բերել և մտցրել քաղաքականության մեջ: Փաստաբանի խոսքով՝ «Մարտի 1»-ի հետ կապված բոլոր մեղադրյալների վերաբերյալ, որոնց նկատմամբ հայտարարված է հետախուզում, ՌԴ-ի կողմից մերժվել է արտահանձնումը, ուստի՝ Սարգսյանին մեղադրանք է առաջադրվել այլ հոդվածով, որն իբրև որևէ քաղաքական ենթատեքստ չունի և այդ մեղադրանքով է արտահանձնումն սկսվել:

«Այս ամենը Մոսկվային է վերաբերում, հարց է ուղղում՝ երբևիցե հարցաքննվել է, թե ոչ: Ինչու դու չգիտե՞ս, որ չի հարցաքննվել: Եթե 2018թ հետախուզում է հայտարարվել, Լևոն Սարգսյանը ոնց պետք է հարցաքննվեր»,- նշեց Սարգսյանը՝ հավելելով, որ արտահանձնումից հետո Լևոն Սարգսյանի մասնակցությամբ առերես հարցաքննություն է եղել, ինչից հետո՝ հաջորդ օրը, Սարգսյանին ՀՔԾ են կանչել՝ Մարտի 1-ի գործով հարցաքննելու համար: Փաստաբանը տեղեկացրեց, որ Մարտի 1-ի գործով Սարգսյանը հրավիրվել էր հարցաքննության՝ վկայի կարգավիճակով, սակայն կասկածանքի շուրջ, ուստի հրաժարվել են ցուցմունք տալուց:

Հիշեցնենք, որ Լևոն Սարգսյանը մեղադրվում է մոտ 12 տարի առաջ Մաքսային կոմիտեի նախկին ղեկավար Արմեն Ավետիսյանի առանձնատան վրա կատարված ավազակային հարձակումը պատվիրելու մեջ։

Ավազակային հարձակումը տեղի է ունեցել 2008 թվականի հոկտեմբերին։ Այն ժամանակ հայտարարվեց, որ «Կոշիկի քաղաք» ՍՊԸ հիմնադիր Արա Կարապետյանը և Նոր Նորքի ոստիկանության բաժնի պետի նախկին տեղակալ Արմեն Նիկողոսյանը ստեղծել են հանցավոր համագործակցություն, որի անդամների կողմից կատարվել են մի շարք աղմկահարույց, առանձնապես ծանր հանցագործություններ կատարելու դեպքեր, այդ թվում` ՀՀ մաքսային պետական կոմիտեի նախկին պետ Արմեն Ավետիսյանի առանձնատան վրա ավազակային հարձակման դեպքը։ 2011թ. մայիսին կայացված դատավճռով հանցավոր համագործակցության 10 անդամները դատապարտվել էին երկարատև՝ մինչև 15 տարի ժամկետով ազատազրկման։

2018 թվականին ԱԱԾ-ն հայտարարեց, որ Արմեն Ավետիսյանի առանձնատան վրա ավազակային հարձակման իրական պատվիրատուն, նախնական տվյալների համաձայն, հանդիսացել է ՀՀ ԱԺ նախկին պատգամավոր, հանրությանը «Ալրաղացի Լյովիկ» մականունով հայտնի Լևոն Սարգսյանը, ով, լարված հարաբերությունների մեջ գտնվելով Արմեն Ավետիսյանի հետ, արդեն իսկ ձևավորված և ավազակային մի շարք հարձակումներ գործած հանցավոր խմբի անդամներին պատվիրել է վերոնշյալ հանցագործության կատարումը:

Գործով մյուս մեղադրյալը՝ Սուրեն Ղազարյանը մեղադրվում է Լևոն Սարգսյանին օժանդակելու մեջ։
Ինչպես արդեն տեղեկացրել ենք՝ Լեւոն Սարգսյանը հայտնաբերվել եւ ձերբակալվել է ՌԴ Մոսկվայի մարզի Զելենոգրադ քաղաքում՝ 2019 թվականի նոյեմբերի 21-ին։

2020 թվականի մարտին հայտնի դարձավ, որ Ռուսաստանի Դաշնության գլխավոր դատախազությունը բավարարել է Լևոն Սարգսյանին քրեական հետապնդման ենթարկելու նպատակով Հայաստանի իրավապահ մարմիններին հանձնելու մասին ՀՀ գլխավոր դատախազության միջնորդությունը։

Նա Հայաստան է տեղափոխվել օգոստոսի 6-ին, գտնվում է «Երևան-Կենտրոն» ՔԿՀ-ում։ Երևանի ընդհանուր իրավասության դատարանը վերահաստատել է Ալրաղացի Լյովիկի նկատմամբ ընտրված խափանման միջոց կալանավորումը։

Հեղինակ՝ Իզաբել Սահակյան

Աղբյուր` Փաստինֆո