Փաստ ինֆո

Կան տեղեկություններ, որոնց համաձայն, ՀՀ երկրորդ նախագահ Ռոբերտ Քոչարյանի Պոզներին տված հարցազրույցից առաջ տեղի է ունենցել Քոչարյանի և ՌԴ նախագահ Վլադիմիր Պուտինի հեռախոսազրույցը,-այս մասին մամուլի ասուլիսի ժամանակ ասաց «Հայաստան» համահայկական հիմնադրամի նախկին տնօրեն Արա Վարդանյանը:

Նա նկատեց, որ ըստ տարածված տեղեկությունների այդ հեռախոսազրույցի ընթացքում քննարկվել են թե Հայաստանում ներքաղաքական իրադարձությունները, թե Արցախին առնչվող հարցերը:

«Շատ հատկանշական է, որ այդ հեռախոսազրույցից հետո նախագահ Քոչարյանը հարցազրույցի ընթացքում հնչեցրել է այն միտքը, որ նա հավատում է, որ հնարավոր է բանակցային ճանապարհով վերականգնել ԼՂՀ-ի տարածքները: Կարծում եմ, խոսքը գնում է Շուշիի և Հադրութի մասին»,-շեշտեց Վարդանյանը:

Նա նշեց, որ Հայաստանում մի շարք կուսակցություններ արդեն սկսել են իրնեց նախընտրական պայքարը և նշում են, որ իրենք խաղաղության կողմնակիցն են, իսկ եթե իշխանության գա ուրիշ ուժ, դա կհանգեցնի պատերազմի:

«Այդ համատեքստում ես ուզում եմ նշել, որ ՀՀ առաջին նախագահ Լևոն Տեր-Պետրսյանը հրաժարական տալուց առաջ ասաց, որ Հայաստանում արժանապատիվ հաշտության և համերաշխության կուսակցությունը լքում է իշխանությունը։ Դրանից հետո 10 տարվա ընթացքում Հայաստանը և Արցախը ապրեցին իրենց ամենաապահով ժամանակները: Հայաստանը և Արցախը տնտեսապես վագրային քայլերով գնում էին առաջ: Իսկ 1998-2008 թվականները փաստել էին, որ Հայաստանը կարող է զարգանալ առանց Արցախը հանձնելու:

Իսկ 2018թ-ին  իշխանության նորից եկավ խաղաղության և արժանապատիվ հաշտության կուսակցություն: Հիմա մենք չունենք խաղաղություն և կնքել ենք նոյեմբերի 9 պայմանագիրը: Պետք է հասկանանք, որ խաղաղություն քարոզող քաղաքական ուժը բերեց այս արհավիրքը», - նկատեց Վարդանյանը:

Նա նաև ասաց, որ Ռուսաստանը հիմա շատ լավ գիտակցում է, թե ով է լինելու Հայաստանի հաջորդ ղեկավարը:

«Ես այլ կերպ չեմ կարող մեկնաբանել այն, որ ՀՀ վարչապետի Ռուսաստան մեկնելուց մի քանի օր առաջ Ռուսաստանի ամենտարածված հեռուստաալիքի եթերում ելույթ է ունենում ՀՀ երկրորդ նախագահը: Դրանով Ռուսաստանի դաշնությունը ցույց է տալիս, թե ով է իր նախընտրած թեկնածուն»,-նկատեց Վարդանյանը:

Նա նաև նշեց, որ մեր երկրում վերջերս շատ է խոսվում այն մասին, որ ցանկալի չէ, որպեսզի Հայաստանի ղեկավարը լինի Ռուսաստանի կամակատար ղեկավար:

«Բայց այսօր գործող իշխանությունը կատարում է բոլոր գերտերությունների պահանջները: Հենց այդ պատճառով է սկսել թուրքերի հետ մերձեցման մասին թեման: Ոչ Լենա Նազարյանը, ոչ էլ Հովիկ Աղազարյանը հիմար չեն, նրանք պարզապես բացում են օվերտոնի պատուհանները: Իրենք հնչեցնում են աբսուրդային մտքեր, նպատակը հենց այս մտքերը հնչեցնելն է, որպեսզի հետագայում ոչ ոք այդքան շոկ չապրի նման գաղափարներից: Դա գործող իշխանությունների ծրագիրն է, քանի որ նրանք հասկանում են, որ իրենց պաշտպանել կարող է միայն Թուրքիան»,-շեշտեց Վարդանյանը:

Աղբյուր` Փաստինֆո