Փաստ ինֆո

Ավագ դպրոցի առաքելությունն այն է, որ ավագ դասարաններում աշակերտներն ընտրեն այն հոսքերը, որոնք իրենք ուզում են, իսկ մասնագիտական կողմնորոշման մասով դպրոցներն ու ԲՈԻՀ-երը աշխատանք են տանում: Այս մասին մամուլի ասուլիսի ժամանակ ասաց ՀՀ ԿԳՄՍՆ բարձրագույն և հետբուհական մասնագիտական կրթության վարչության պետի պաշտոնակատար Լուսինե Գրիգորյանը:

Նա ասաց, որ ԲՈւՀ-երը  բաց դռների օր են կազմակերպում և  շրջանավարտներին  ծանոթացնում են տարբեր մասնագիտությունների նրբություններին:

ԲՈՒՀ-երի ընդունելության նախապատրաստական աշխատանքների մասին խոսելով, Գնահատման և թեստավորման կենտրոնի փոխտնօրեն Կարո Նասիբյանն էլ ասաց, որ հայտագրման գործընթացն սկսվելու է ապրիլի 15-ին, ավարտվելու է մայիսի 10-ին։

«Առաջին հերթին դիմորդը պետք է դիմի իր դպրոցի տնօրենին և խնդրի որ իրեն գրանցեն։  Քանի որ միասնական քննություններից բացի գոյություն ունեն նաև ավատական քննություններ, պետք է գրանցեն նաև քննությունները: Դպրոցը ստանում է Գնահատման և թեստվորման կենտրոնի անձնական համարը, որն ստանալուց հետո շրջանավարտը ինքն է ընտրում, ինքնուրույն լրացնել դիմում-հայտը, թե դիմել դպրոցի օժանդակությանը: Դիմում-հայտերը պետք է ուղարկել  dimord.am կայքին,-հայտնեց Նասիբյանը:

Նա նաև շեշտեց, որ անցյալ տարի հակերները հարվածել են կայքին: «Մենք դիմեցինք կայքի աշխատողին, և նա կարողացավ ապահովել կայքի անխափան աշխատանքը: Այս անգամ մենք արդեն կարողացել ենք լուծել նաև այս խնդիրը»:

Նասիբյանը նաև անդրադարձավ գալիք փոփոխություններին, նշելով որ այժմ նախապատվություն է տրվելու մասնագիտական կողմնորոշմանը:

«Այսինքն, դուք որպես դիմորդ պետք է հասկանաք, թե որտեղ եք ցանկանում շարունակել ուսումը: Նախկինում  ստացվում էր այնպես, որ կեսը կամ կեսից մի քիչ ավելին ընդունվում էին առաջին հայտով, իսկ մնացածների դեպքում՝  երկրորդ հայտի բարձր միավորը դուրս էր մղում երրորդին, երրորդը հանում էր չորրորդին: Արդյունքում դիմորդը չէր սովորում այնտեղ, որտեղ ցանկանում էր։

Մենք այս տարի որոշեցինք կիրառել կարգում հետևյալ փոփոխությունը «մեկ ԲՈԻՀ, մեկ մասնագիտություն» սկզբունքով: Ընդունվում են նրանք, ովքեր դիմել են առաջին հայտով, այդ մասնագիտությամբ: Մրցույթն ավարտելուց հետո, թափուր տեղեր առաջանալու դեպքում, նրանք, ովքեր դուրս են մնացել իրենց ընտրած մասնագիտությունից կարող են իրենց դրական միավորներով մասնակցել թափուր տեղերի մրցույթին: Դա լինելու է հուլիսի 18-ից հետո»,-հայտնեց Նասիբյանը:

Աղբյուր` Փաստինֆո