Փաստ ինֆո

Երբ այսօր մենք գալիս էինք Սևան ինձ մոտեցավ մի տարեց մարդ և հարցրեց, թե մենք ինչ դարձրեցինք այս երկիրը։ Դեռ երկու տարի առաջ ես կարող էի պատասխանել այս մարդուն: Այս մասին Սևանում հանրահավաքի ժամանակ ասաց Հայրենիքի փրկության շարժման վարչապետի միասնական թեկնածու Վազգեն Մանուկյանը: 

«Երկու տարի առաջ ես կասեի, որ շատ թերություններ ունեցանք, բայց մենք նաև հաղթանակներ ունեցանք: 5000 ժողովուրդ աշխարհի երեսին ուզում են պետություն ունենալ, իսկ գոյություն ունի ընդամենը 200 պետություն: Մենք կառուցեցինք մի բանակ, որը ամենամարտունակն է Անդրկովկասում, մենք կարողացանք վերադարձնել մեր Հայրենիքի այն հատվածը, որը կոչվում է Արցախ: Այժմ, այս 44 օրից հետո ես պատասխան չունեմ: Այն ինչ կատարվեց այս 44 օրվա ընթացքում, դա պատերազմ չեր, պատերազմ մենք տեսել ենք 90-ականներին: Այն ժամանակ մենք ունեինք և հաջողություններ, և անհաջողություններ, առաջընթաց և նահանջ: Այ ժամանակ մենք տեղյակ էինք, թե որտեղ է կանգնած մեր զորքը»,-ասաց Վազգեն Մանուկյանը հայտարարելով, որ արցախյան այս վերջին պատերազմը ոչ այլ ինչ էր, քան՝ սպանդանոց։ Նա ավելացրեց, որ փակված էին բոլոր լրատվական միջոցները, ոչ մի տեղեկություն չուներ ժողովուրդը, իսկ իշխանությունը հազարներով կրակի տակ էր գցում երիտասարդներին:

«Մենք վստահ էինք, որ հաղթում ենք, բայց պարտվում էինք: Հազարներով զոհվում էին մեր երիտասարդները: Իրենք ոչնչացրեցին մեր Հայրենիքը և շարունակում են ոչնչացնել»,- ասաց Մանուկյանը:

Նա նաև շեշտեց, որ չի ընդունում այս արտահերթ ընտրությունները: «Մենք պետք է քշենք այս իշխանությանը և մեր զավակներին ապացուցենք, որ դավաճանությունը չենք ներում: Սա պետք է անի մեր ամբողջ ժողովուրդը: Եվ դրանից հետո մենք կզգանք, որ վերականգնում ենք մեր արժանապատվությունը»։

Հայրենիքի փրկության շարժման վարչապետի միասնական թեկնածուն ընդունում է , որ պատերազմում նաև  պարտվում են , բայց դա պետք է արժանապատվորեն անել։ «Իսկ այժմ ոչ մի ազգ ամբողջ աշխարհում մեզ չի հարգում: Գերմանիան էլ պարտվեց երկրորդ համաշխարհային պատերազմում, բայց Գերմանիան ազատվեց ֆաշիզմից և կարողացավ առաջ գնալ», - ասաց Հայրենիքի փրկության շարժման թենածուն:

Մանուկյանը նաև նկատեց, որ հիմա խոսակցություններ են գնում սահմանների բացման մասին:

Ըստ նրա, ստացվում է, որ իշխանությունները դիտավորյալ պարտվել են պատերազմը,  որ սահմանները բացե՞ն։ Վազգեն Մանուկյանի կարծիքով, սրանից հետո մենք լավ չենք ապրելու, հետևաբար պետք է հեռացնել այս իշխանություններին:

«Մեր շարժումը գտնում է, որ այս իշխանությունը պետք է հեռանա, պետք է ժամանակավոր կառավարություն ստեղծվի, երկիրը կհանդարտվի, ինչից հետո կանցկացվեն արտահերթ ընտրություններ: Իսկ այժմ այս ընտրությունները մեզ գլխացավանքից բացի ոչինչ չեն բերելու: Մենք պետք է հավաքվենք և ամբողջ ժողովրդով մինջև ընտրությունները դուրս շպրտենք այս իշխանություններին»,-հայտարարեց Մանուկյանը:

«Մենք ունենք դաշնակիցներ` Ռուսաստանը, Իրանը, Չինաստանը, Արաբական պետությունները, Ֆրանսիան, մենք ունենք Սփյուռք և մենք ունենք հայ զինվոր: Միջնադարից ի վեր հայտնի էր, որ հայ զինվորն ամենահզոր զինվորն է, և մեր բանակը մեղավոր չԷ, որ այսպես ստացվեց: Հիմա Հայաստանը բարեկամություն է մուրում Թուրքիայից, սակայն եթե մենք գնանք այս ճանապարհով մենք կդադարենք գոյություն ունենալ: Իսկ մենք ունենք բոլոր հնարավորությունները Հայաստանը դարձնել ուժեղ և հզոր բանակ ունեցող երկիր»,-եզրափակեց Մանուկյանը:

Աղբյուր` Փաստինֆո