Փաստ ինֆո

Ակնհայտ է, որ տեղի են ունեցել բռնությամբ մահեր և պետք է պարզել՝ ինչ հանգամանքներում են տեղի ունեցել։ Լրագրողների հետ զրույցի ժամանակ այս մասին ասաց ՀՀ երկրորդ նախագահ Ռոբերտ Քոչարյանի պաշտպանական խմբի անդամ Արամ Օրբելյանը։

«Պետք է պարզել՝ դա եղել է սպանությու՞ն, թե՞ եղել է անզգուշությամբ մահ պատճառել։ Այսինքն բազմաթիվ քրեադատավարական հոդվածներ կան, որոնք մարդու մահվան դեպքում կարող են գործել։ Հետո պետք է պարզել՝ եղե՞լ է հրաման, թե ոչ։ Մոտեցումը, որ երկրի ղեկավարությունն ամեն ինչ իմացել է, ինքն է հրաման տվել, ինքնին կիրառելի չէ։ Չի կարելի այդ մոտեցմամբ առաջ գնալ և մարդու իշխանական լիազորություն ունենալու հանգամանքն օգտագործել ու ասել, որ ինքն է մեղավոր»,-նշեց Արամ Օրբելյանը։

Վերջինս նշեց, որ Մարտի 1-ի գործով պետք է քննություն իրականացնեն, իսկ եթե չգիտեն ինչպես անել, կարող են դիմել մասնագետների։ Արամ Օրբելյանը նկատեց՝ տուժողների իրավահաջորդների ներկայացուցիչները նույնպես պետք է հետաքրքրված լինեն, որ ոչ թե ինչ-որ կոնկրետ մարդ դատապարտվի, այլ այդ հանգամանքները պարզաբանվեն.

«Կա քրեական գործ, որի քննության առարկա են նաև 10 մահվան հանգամանքները և համապատասխանաբար պետք է կենտրոնանալ առանձին-առանձին ամեն մարդու մահվան հանգամանքները պարզաբանելու վրա։ Ոչ թե ասեն, որ վերևից մեկին բռնել են, հիմա կդատեն, այլ փորձեն հատիկ-հատիկ պարզաբանել ամեն մահվան հանգամանք՝ ստանալով համապատասխան ձայնագրություններ, տեսագրություններ»,-ասաց պաշտպանը։

Արամ Օրբելյանը հորդորեց տուժողների իրավահաջորդներին դիմել ՀՔԾ՝ հասկանալու համար որ փուլում է իրենց գործը. «Թող մոռանան, որ ցանկանում են քաղաքական գործընթացի մասնակից դառնալ։ Եթե կբացահայտվի, որ պարոն Քոչարյանը հանձնարարություն է տվել կրակել ինչ-որ մեկին, ապա այդ ժամանակ կլինի նոր գործ»,-ասաց Արամ Օրբելյանը։

Վերջինս նշեց, որ կաշառքի դրվագով գործը հաջորդ շաբաթ կշարունակվի։ Պաշտպանը նշեց, որ մինչև հիմա գործընթացին ոչ մեկ լուրջ չի վերաբերվել, քանի որ այն ավելի շատ ձևական է եղել, կենտրոնացումը եղել է 300.1-ի վրա. «Մի շարք հանգամանքներ կան, որոնք հիմք են տալիս ենթադրել, որ այս պահին գործընթացն ունի օրինականության խնդիր»։

Աղբյուր` Փաստինֆո