Փաստ ինֆո

ՀՀ գլխավոր դատախազի դիմումի հիման վրա Սահմանադրական դատարանի որոշումը կարող է հիմք հանդիսանալ Ռ.Քոչարյանի եւ մյուսների նկատմամբ ՀՀ քրեական օրենսգրքի 300.1-րդ հոդվածով հետապնդումը դադարեցնելու դատական ակտը վերանայելու համար։ Այսօր նման հայտարարությամբ է հանդես եկել քրեական գործով դատարանում մեղադրանքը պաշտպանող դատախազ Պետրոս Պետրոսյանը։ 

Նա ձեռնպահ մնաց գնահատական տալ 300.1-րդ հոդվածը հակասահմանադրական ճանաչելու մասին ՍԴ որոշմանը, սակայն նշեց, որ սահմանադրական կարգը տապալելու վերաբերյալ մեղադրանքների մասով դատախազությունը հայտնել է իր դիրքորոշումը, համաձայն որի՝ ՍԴ կողմից կայացված որոշումից հետո որոշակի խնդիրներ են առաջացել թե՛ դատախազության կողմից իրենց լիազորություններն իրականացնելու, թե դատարանի կողմից հետագայում տուժողների իրավունքներն ապահովելու տեսանկյունից:

Հիշեցնենք, որ Ռոբերտ Քոչարյանի, Սեյրան Օհանյանի, Յուրի Խաչատուրովի եւ Արմեն Գեւորգյանի նկատմամբ ՀՀ քրեական օրենսգրքի 300.1-րդ հոդվածով հետապնդումը դադարեցվեց եւ այդ մասով գործի վարույթը կարճվեց։ Բոլորն էլ ձեռք բերեցին արդարացվածի կարգավիճակ, սակայն Ռ.Քոչարյանն ու Ա.Գեւորգյանը կաշառքի դրվագով կշարունակեն մնալ մեղադրյալ։

Դատախազ Պետրոսյանը նշեց, որ բոլոր հարցերին համակողմանի անդրադառնալ հնարավոր է միայն դատարանի որոշումը ստանալուց հետո:

Ինչ վերաբերում է դատախազների ներկայացրած միջնորդությունը՝ գործի վարույթը կասեցնելու մասին, Պետրոսյանը նշեց, որ առանձին քննարկելու պայմաններում առարկայազուրկ է դառնում միջնորդությունը, այսինքն՝ եթե դատարանը գտնում է, որ կիրառման ենթակա նորմի վերաբերյալ կողմն առերևույթ հակասահմանադրականության խնդիր է տեսնում՝ այդ հարցը բարձրացնելով դատարանի առջև, անտրամաբանական է քննարկել հետապնդումը դադարեցնելու մասին միջնորդությունը, լուծել, որից հետո անդրադառնալ դատախազների միջնորդությանը:

Ինչ վերաբերում է նրան, որ ՀՀ գլխավոր դատախազը դիմել էր ՍԴ և ինչ կարող է հետևել ՍԴ-ի կողմից վիճարկվող հոդվածների հակասահմանադրական ճանաչվելուն, Պետրոսյանը նշեց, որ դատական ակտերը վերանայելու քրեադատավարական կառուցակարգեր կան և ՍԴ կողմից կայացված որոշումը նոր հանգամանք է՝ օրինական ուժի մեջ մտած դատական ակտերը վերանայելու:

Աղբյուր` Փաստինֆո