Փաստ ինֆո

«3 տարի առաջ եկան Սևան, խոստացան միլիոնների ներդրումներ, ճոպանուղի, ճեմուղի, հյուրանոցային տնտեսություն. Հիմա հարց՝ ի՞նչ են արել 3 տարվա մեջ, ո՞ւր են այդ ներդրումները, չկա՝ խաբել են»,- այս մասին այսօր ասաց «Հայրենիքի փրկության խորհրդի համակարգող», ՀՅԴ ԳՄ ներկայացուցիչ Իշխան Սաղաթելյանը։ 

Սևանի Սուրեն Զաքարյանի անվան մշակութային պալատի հարակից հրապարակում տեղի է ունենում Հայրենիքի փրկության շարժման հանրահավաքը։ Դիմելով Սևան քաղաքի բնակիչներին Սաղաթելյանը նշեց, որ այն ՔՊ-ական պատգամավորները, ովքեր իբրև ուսապարկեր 15-20 հազար ձայն հավաքեցին Սևանից ու հայտնվեցին խորհրդարանում, մաս են կազմել դավաճանական ծրագրին։

«Ես խոստանում եմ՝ ձեզանից ներողություն են խնդրելու, որովհետև հերթական անգամ Ձեզ խաբել են»։

Սաղաթելյանը նշեց, որ ժամանակին ժողովրդին խաբել են, խոստացել անվտանգություն, բարեկեցիկ կյանք, արժանապատիվ ապագա ու բարձր աշխատավարձ, երեխաներին էլ՝ լավ կրություն։

«Ի՞նչ ունենք 3 տարի անց։ Ունենք կորսված հայրենիք, 500-ից ավելի զոհ, փլուզված տնտեսություն և հայ մարդն այսօր հույս չի կապում այս երկրի հետ։ Եթե ժամանակին Հայաստանից արտագաղթում էին նրանք, ովքեր ապրելու պարզ միջոցներ չունեին, հիմա արտագաղթում են նաև մարդիկ, ովքեր ունեն ապրելու հնարավորություն, պարզապես հույս չեն տեսնում այս երկրի ապագայի հետ»։

Սաղաթելյանը սևանցիներին հիշեցրեց, որ պատերազմից առաջ Գեղարքունիքի մարզը թշնամու հետ 82 կմ հատվածով սահման ուներ, հիմա այդ սահմանը դարձել է 160 կմ։ Մարզի անվտանգությունն ունի լուրջ խնդիրներ։ Սահմանը պահելու համար անհրաժեշտ է հսկայական ռեսուրս և ենթակառուցվածքներ։ Պատերազմից հետո կա 7000 տեղահանված ընտանիք՝ շուրջ 30.000 մարդ, իսկ այս իշխանությունն ի վիճակի չէ պաշտպանել ժողովրդի շահերը, իրավունքները։

«Մեր մարզը առաջիկայում շատ ավելի կոնկրետ է տեսնելու այդ խնդիրները։ Վարդենիսի շրջանի մեր բնակիչները առաջիկայում զգալու են այն գյուղատնտեսական խնդիրները՝ խոտհարքի, վարելահողերի հետ կապված, որոնք արդեն թշնամու հսկողության տակ են»,- եզրափակեց Սաղաթելյանը։

Աղբյուր` Փաստինֆո