Փաստ ինֆո

Ընտրական օրենսգրքի փոփոխությունները արվել են նաև խորհրդարանական և արտախորհրդարանական ուժերի պահանջով, որպեսզի ընտրություններ անցկացվեն: Այս մասին «Փաստինֆո»-ի հետ զրույցում ասաց ԱԺ «Իմ քայլը» խմբակցության պատգամավոր Վահագն Հովակիմյանը:

««Բարգավաճ Հայաստանը» մշտապես ասել է, որ կողմնակից է տարածքային ցուցակները հանելուն, դա եղել է նաև իրենց նախընտրական խոստումների մեջ, «Լուսավոր Հայաստանի» նախընտրական խոստումներում ևս կար ԸՕ փոփոխությունների հարցը, բայց այս փուլում պարզվեց, որ իրենց կարծիքը փոխել են և քննարկումների ժամանակ դեմ էին արտահայտվում տարածքային ցուցակները հանելուն»,-ասաց իմքայլական պատգամավորը:

Վահագն Հովակիմյանի համոզմամբ՝ պարզ համամասնական ընտրակարգը նպաստում է քաղաքական ուժերի զարգացմանը, ընտրություններում որոշիչ են դառնում քաղաքական ուժերը և նրանց գաղափարները, իսկ ռեյտինգային համակարգի դեպքում ավելի որոշիչ է անհատների գործոնը, իսկ կուսակցական գաղափարները մղվում են հետին պլան.

««Իմ քայլին» ձեռք էր տալիս ռեյտինգային ընտրակարգը ձեռնտու էր, բայց քանի որ մենք այդ խոստումը տվել ենք, ու այստեղ քաղաքական դաշտի զարգացման հեռանկարի հարցն էր, այս դեպքում անձնական նպատակահարմարությունը գնում է երկրորդ պլան»,-ասաց Հովակիմյանը:

Պատգամավորը նաև հայտնեց, որ ՔՊ-ի վերջնական ցուցակը կձևավորվի ընտրական գործընթացի պաշտոնական մեկնարկից հետո և հույս հայտնեց , որ ցուցակում ընդգրկված կլինեն նաև նոր անուններ:

Հարցին՝ թե արդյոք իրեն տեսնում է հաջորդ խորհրդարանում, Հովակիմյանն արձագանքեց.

«Այսպես որ նայում եմ՝ հա»:

Վահագն Հովակիմյանը վստահ է, որ հաջորդ խորհրդարանում ևս «Իմ քայլը» լինելու է մեծամասնություն:

«Խորհրդարանում մեծամասնություն լինելու ենք և նշանակալի մեծամասնություն»,-համոզված է իմքայլական պատգամավորը:

Աղբյուր` Փաստինֆո