Փաստ ինֆո

ԼՀԿ-ն չի գնում այս ընտրություններին մի քանի պատգամավորական տեղեր վերցնելու համար, հետևաբար, մենք մեր բոլոր հնարավորությունները պետք է օգտագործենք այն 47 % չկողմնորոշված մարդկանց, համոզենք, որ մեզ ընտրեն: Այս մասին լրագրողների հետ զրույցում ասաց «Լուսավոր Հայաստան» խմբակցության պատգամավոր Անի Սամսոնյանը.

«2018թ-ը և 2021թ-ը լրիվ տարբեր տարիներ են քաղաքական իրավիճակներով: 2018 թ-ին մենք չենք ասել, որ լինելու ենք իշխանություն, տեղի էր ունեցել հեղափոխություն և հեղափոխական ուժը պետք է լիներ իշխանություն:

Հիմա իրավիճակը լրիվ այլ է յուրաքանչյուր քաղաքական ուժ հնարավորություն ունի մարդկանց համոզելու, որ իրենց ընտրեն»,-ասաց Սամսոնյանը:

Հարցին՝ ինչպե՞ս է ԼՀԿ-ն պատկերացնում Հայաստան-Թուրքիա հարաբերությունները, Սամսոնյանն արձագանքեց.

«Մենք ծրագիր ենք ներկայացնելու, որտեղ կա անվտանգության և արտաքին քաղաքականության բաղադրիչ ու այդ երկու բաղադրիչներով մենք քաղաքացիներին կասենք մեր լուծումների ու մեր պատկերացնումներ մասին»:

Պատգամավորի հավաստմամբ՝ Թուրքիայի հետ հարաբերություններ հաստատելու հարցին պետք է մոտենալ հավասարակշռված. «Մենք պետք է հարցին մոտենանք հանդարտ կերպով, առանց պարզունակ մոտեցումների, դուրս գալով Թուրքիան մեր թշնամին է, կամ Թուրքիան մեր թշնամին չէ, այդ պատկերացումներից: Մենք ունենք արտաքին ու ներքին անվտանգության լուրջ խնդիրներ, մենք չենք կարողանում այսօր մեր հարաբերությունները նորմալ կարգավորել մեր բարեկամ երկրների հետ, ուր մնաց՝ մեր հակառակորդ երկրների հետ, ովքեր ամեն օր մեզ ֆիզիկապես սպառնում են»,-ասաց Անի Սամսոնյանը

Վերջինս նշեց, որ մենք ունենք հակառակորդներ, ովքեր սպառնում են մեր գոյությանը՝ որպես ազգ, իրենց հետ հարաբերությունները պետք է կառուցվի ըստ այդմ.

«Եթե որևէ մեկը սպառնում է ֆիզիկապես քեզ ոչնչացնել, ինչպե՞ս կարող ես նրանց նկատմամբ բարեկամաբար տրամադրվել, ինչու են այդ խաղաղասիրական կոչերը միայն մեզ պարտադրվում: Մե՞նք ենք ագրեսիա ցուցաբերում, մեր նկատմամբ են ցուցաբերում: Թող խաղաղասիրության կոչեր պարտադրեն նրանց, ովքեր սպառնում են ոչնչացնել մեզ»,-ասաց Անի Սամսոնյանը:

Աղբյուր` Փաստինֆո