Փաստ ինֆո

Լենինգրադյան 23/11 հասցեին հարող տարածքում կառուցապատողը որոշել է կանաչ գոտու փոխարեն 6 հարկանի բնակելի շենք կառուցել՝ անմիջապես ճամփեզրին։ 

«Փաստինֆո»-ին հայտնել էին հարակից շենքերի բնակիչները։ Նրանք ահազանգում են, որ դեպի Նոյ թաղամաս տանող ճամփեզրին կառուցապատողը շինարարություն է սկսել, ձողեր է տեղադրել ճանապարհի վրա, անգամ շենքի բակ տանող ասֆալտապատ տարածքն է փորել՝ ասելով, թե իր սեփականությունն է։ Բնակիչները զրկվել են ոչ միայն անվտանգ երթևեկելու հնարավորությունից, այլ նաեւ՝ քայլելու, քանի որ դեպի կանգառ տանող ճանապարհահատվածում այլեւս չկա անգամ արահետ՝ հետիոտնի համար նախատեսված։

Շինարարական աշխատանքների վայրում շինթույլտվության մասին փաստաթուղթ փակցված չէ, աշխատակիցն է հայտնել, որ պատրաստվում են բնակելի շենք և ստորգետնյա ավտոկայանատեղի կառուցել։ Նաև ավելացրել է, թե նախկինում թույլ չէր տրվել սուպերմարկետի կառուցումն անգամ, իսկ հիմա ունեն բնակելի շենք կառուցելու թույլտվություն։

Երբ շենքը պատրաստ լինի՝ նեղ ճանապարհով հնարավոր չի լինելու ապահովել երկկողմանի երթևեկությունը, քանի որ այս  ճանապարհը, որը   տանում է դեպի Նոյ թաղամաս, ծառայելու է նաև դրան հարակից կառուցվող բնակելի նոր թաղամասին։ Ասել է թե՝ այսօր փլատակների նմանվող այս ճանապարհը բարեկարգելու, ավելի լայնացնելու, հարակից տարածքը կանաչապատելու փոխարեն՝ նոր շենք է կառուցվում ճանապարհի հաշվին։ Ինչպես շատ դեպքերում, այս դեպքում էլ կարելի է ասել ոչինչ, որ ավտոմեքենաները վաղը չեն կարողանա երթեւեկել դեպի նոր կառուցվող, ինչպես նաեւ արդեն իսկ կառուցված Լենինգրադյան 23/11, 23/13 հասցեները, ոչինչ որ չի լինելու մայթեզր քայլելու համար, ոչինչ, որ մարդիկ չեն կարողանալու մուտք գործել իրենց շենքի բակ՝ ստորգետնյա ավտոկայանատեղիի պատճառով։  

Երևանի քաղաքապետի մամուլի խոսնակ Հակոբ Կարապետյանը «Փաստինֆո»-ի հետ զրույցում խնդրին տեղեկանալուց հետո նշեց, որ եթե պատշաճ չի իրականացվել բնակչության իրազեկումը, ապա խախտման համար կառուցապատողը պետք է տուգանք վճարի։ Սակայն ձեռնպահ մնաց տեղեկատվություն տրամադրել, թե արդյոք կառուցապատողն իրապես ունի ճանապարհի հաշվին բնակելի շենք կառուցելու թույլտվություն։ Նրա փոխանցմամբ՝ անհրաժեշտ է գրավոր հարցմամբ դիմել տեղեկանալու շինարարության թույլտվության մասին վկայող փաստաթղթերին։ Մինչև այդ կուսումնասիրեն բնակիչների նկարահանած տեսանյութերը և համապատասխան մարմինների կողմից կտուգանվեն։

«Միանգամից կակտավորվեն, նույնիսկ եթե թույլտվություն ունեն, որովհետև պատշաճ կերպով պետք է կահավորեն»,- ասաց մամուլի քարտուղարը։

Նշենք, որ շինարարության նախապատրաստական աշխատանքներն արդեն մի քանի օր է, ինչ ընթացքի մեջ են, սակայն քաղաքային իշխանությունները ցուցաբերել են քար անտարբերություն.

Բնակիչները կահազանգեն՝ կզբաղվեն, չէ՝ անօրեն շինարարությունը կշարունակվի։

Աղբյուր` Փաստինֆո