Փաստ ինֆո

Կոմանդոսը կադրային սպա էր՝ դպրոց անցած, իսկ ջոկատի տղաների մեծամասնությունը ռազմական գիտելիքներ չուներ, ինչը նորմալ էր, զարթոնք էր, մարդիկ հայրենիք էին պաշտպանում, մեզ անհրաժեշտ էին կադրային սպաներ, որոնցից մենք գիտելիքներ կարող էինք ձեռք բերել։ Կոմանդոսը շատ մեծ ներդրում ունի մեր՝ «Սասունցի Դավիթ» ջոկատի տղաների պատրաստության, մարդկային դաստիարակության, ոգու հարցում։ Սկսվեց մեր ջոկատից, հետագայում՝ բանակի կազմավորումից։ Այս մասին «Փաստինֆո»-ի թղթակցի հետ զրույցում պատմեց ազատամարտիկ Կարեն Առաքելյանը։

Շուշիի ազատագրմանն անդրադառնալով՝ Առաքելյանը նշեց, որ Շուշիի օպերացիան մտել է շատ երկրների ռազմական ուսումնական դասագրքերում։

«Օպերացիա, որն ուսումնասիրում են, սովորում են, թե ինչպես կարելի է քիչ զոհերով քիչ քանակով նման օպերացիա մշակել, ի կատար ածել և հաղթել։ Այ ինչ ենք սովորել Կոմանդոսից, ափսոսում եմ... հրաշալի մարդ էր, հրաշալի անձնավորություն, դեռ չեմ համակերպվում, որ մեր Կոմանդոսը, մեր Իվանիչը մեզ հետ չէ»,- նշեց Առաքելյանը՝ պատմելով, որ Կոմանդոսից շատ բան է սովորել՝ զուսպ լինելը, քանի որ ինքը երիտասարդ էր, տաքարյուն, Կոմանդոսը՝ ավելի մեծ, փորձառու, սովորեցնում էր ճիշտ կողմնորոշվել, մարդկանց հետ շփվել և երբեք չհպարտանալ։

«Միշտ՝ արա և անցիր, հետո կգնահատվի՝ կգնահատվի, չգնահատվի՝ ոչինչ, էլի արա ու անցիր»,- նշեց մեր զրուցակիցը՝ շարունակելով պատմությունը.

«Շատ խիստ էր։ Այն աստիճանի խստության, որ մի օր տղաները բողոքել էին, մեր հրամանատար Աշոտը կանչեց ասեց՝ Իվանիչ, գնդապետ ես, լեյտենանտ կսարքեմ»։

Նա ընդգծեց, որ եթե բանակում խստություն չեղավ՝ բանակը բանակ չի, կիսելով, ելակներով և փոխնորդներով բանակ չեն պահում, խստություն պետք է լինի։

«Ջահել 18 տարեկանը, որ բանակ է գնում, նա պետք է այդ մտքի հետ համաձայն լինի, պատրաստ լինի։ Իզուր չէ, որ խորհրդային տարիներին դպրոցում նախնական ռազմական գիտելիքներ էին տալիս, երիտասարդին պատրաստում էին՝ բանակում ծառայելու համար, որ մամայի փեշի տակից դուրս ես եկել, տղամարդ ես դառնում, դժվարություններ կլինեն»,- նշեց նա։

Աղբյուր` Փաստինֆո