Փաստ ինֆո

Երբ իշխանության ներկայացուցիչները խոսում են Թուրքիայի հետ բարեկամությունից, դրանով փակում են հայոց պատմության վերջին էջը, քանի որ բարեկամության հաջորդ քայլը կլինի Զանգեզուրի, Մեղրիի և Սյունիքի հանձնումը։ «Փաստինֆո»-ի հետ զրույցի ժամանակ այս մասին ասաց միջազգային դաշինքի անդամ բելգիաբնակ Սարգիս Սիմոնյանը։

«Ո՞նց կարող եմ հանդուրժել ու ընդունել դարավոր թշնամուն, բացառվում է։ Ինչքան հանդուրժենք մարդկանց ուղեղը լվացող իշխանություններին, այնքան մարդկանց էշի տեղ են դնելու ու շարունակեն իրենց ծրագիրը»,-նշեց Սարգիս Սիմոնյանը։

Վերջինս նկատեց՝ Ցեղասպանության ճանաչումը ոչ թե բարոյական հանգստություն է տալու մեզ, այլև օրենսդրությամբ հնարավորություն է տալու, որ ցեղասպանության զոհերի ժառանգները փոխհատուցում ստանան, ինչպես նաև վերադարձվեն տարածքները։ Սարգիս Սիմոնյանը նշեց, որ մեր պայքարը դա է, սակայն մինչ օրս ոչ մի իշխանություն չի գնացել այդ պահանջի կատարմանը. «Հենց եկել, նստել են աթոռին, անմիջապես մոռացել են այդ մասին։ Սփյուռքում ամեն տարի ոտքի են ելնում, երթ անում, բայց չէ՞ որ հասարակ ժողովուրդը ոչինչ չի կարող անել այնքան ժամանակ, մինչև պետական մարմիննեը քայլեր չձեռնարկեն։ Ներկայիս իշխանություններն առաջին իսկ պահից պետք է զբաղվեին բանակի, Արցախի հարցով, ինչպես նաև ցեղասպանության ճանաչման հարցով։ Թուրքիայի հետ բարեկամության թեման շոշափելուց առաջ եկեք չմոռանանք, որ դեռ կան հազարավոր անհետ կորածներ ու գերիներ։ Նոյեմբերի 9-ի կապիտուլյացիոն պայմանագրի մեջ նշված էր, որ պետք է գերիների փոխանակում լինի, բայց արդեն վեց ամիս է անցել ու դեռ չի եղել փոխանակում։ Այդքանից հետո ինչպե՞ս թուրքի հետ բարեկամություն անենք»,-նշեց բելգիաբնակ Սարգիս Սիմոնյանը։

Սարգիս Սիմոնյանը կարծում է՝ 2020թ.-ի սեպտեմբերի 27-ին Ադրբեջանի կողմից սանձազերծված պատերազմը, որին զոհ դարձավ երեք սերունդ, ծրագրված էր։ Նրա խոսքով Սփյուռքից երիտասարդները ցանկանում էին գալ և պատերազմին մասնակցել, սակայն արգելք դրեց. «Քանակություն դրեց, որ այդ քանակությամբ կարող են գնալ։ Բոլոր զոհերի 80 տոկոսը երիտասարդ երեխաներ էին, անփորձ զինվորներին առաջնագիծ ուղարկեցին։ Այդքանից հետո մարդ ո՞նց կարող է չգիտակցել, որ սա ծրագրված էր»,-նշեց Սարգիս Սիմոնյանը։

Հարցին՝ արդյոք իշխանություններն այժմ հրաժարական չեն տալիս, քանի որ հնարավոր է այլ պարտավորություններ ունեն, Սարգիս Սիմոնյանն ասաց. «Այո, դեռ ծրագիրը չի ավարտել։ Ինչպես պատերազմն էր ծրագրված, այնպես էլ այն ամենը, ինչ կատարվում է հիմա։ Հարց է առաջանում՝ արդյոք նոյեմբերի 9-ի կապիտուլյացիոն պայմանագիրը միայն Արցախին էր վերաբերում։ Հետևում կանգնած են բավականին շատ մութ անկյուններ, որոնք չեն բացահայտվել։ Ներկա իշխանությունը բացի կործանումից, ուրիշ ոչ մի ծրագիր չունի։ Եթե դիմացինն ասում է, որ մեկ է մեր վերջը տալու են, այդքանից հետո ինչպե՞ս կարող ենք ասել, որ կբարեկամանանք իրենց հետ»,-ասաց Սարգիս Սիմոնյանը։

Նրա խոսքով այս ընթացքում իշխանությունները ցեղասպանության ճանաչման պահանջով որևէ երկրի չեն դիմել, փոխարենն անընդհատ նախկիններին են մեղադրում. «Տեսանք՝ ինչպես պատժեցին։ Բացարձակ ոչնչով չպատժեցին և այսքանից հետո դեռ շարունակում են վստահություն ներշնչել ու հույս տալ, որ լա՞վ պետք է լինի։ Եթե ժամանակին կոռուպցիան էր իշխում Հայաստանում, ներկա դրությամբ դիկտատուրան է իշխում Հայաստանում»,-նշեց Սարգիս Սիմոնյանը։

Վերջինս նշեց, որ այս պահին Բելգիայում և մնացած երկրներում հայ համայնքը բավական պասիվ է. «Մի շրջանում ցույցեր կազմակերպվեցին, սակայն մեր ղեկավարության կողմից լիազորագիր չստացանք, որ խնդրենք Եվրոպայից աջակցել մեզ։ Բելգիայի կառավարությունը մեզ պատասխանեց, որ եթե մեր ղեկավարն իրենց չի դիմում, մենք ինչու՞ ենք դիմում»,-եզրափակեց Սարգիս Սիմոնյանը։

Աղբյուր` Փաստինֆո