Փաստ ինֆո

Ճանապարհների փակումը դա ճնշում էր, որոնց տակտիկական և ռազմավարական խնդիրների լուծման շրջանակներում է պետք նայել,- այս մասին «Փաստինֆո» -ի հետ զրույցում ասաց քաղտեխնոլոգ Կարեն Քոչարյանը:

Հիշեցնենք, որ փետրվարի 25-ից, երբ ՀՀ զինված ուժերի գլխավոր շտաբը, հրամանատարները հանդես եկան Նիկոլ Փաշինյանի ու կառավարության հրաժարականի պահանջով, Հայրենիքի Փրկության շարժումը նախ փակեց Բաղրամյան պողոտան, այնուհետեւ նաեւ Դեմիրճյան փողոցը, իր զորակցությունը հայտնելով բանակին։ ՀՓՇ-ն արգելափակել էր ԱԺ պաշտոնական մուտքերն ու ելքերը՝ պահանջելով արտահերթ նիստ հրավիրել՝ ն.Փաշինյանին անվստահություն հայտնելու պահանջով։

Խորհրդարանական ընդդիմության հետ հանդիպումներից հետո՝ 2021 թվականի մարտի 18-ին, Ն. Փաշինյանը հայտարարեց, որ հունիսի 20-ին տեղի կունենան արտահերթ ընտրություններ, ինչից օրեր անց ՀՓՇ-ն բացեց Բաղրամյան պողոտան, իսկ ապրիլի 3-ից նաեւ՝ Դեմիրճյանի փողոցը։

«Այսօրվանից ազատում ենք Դեմիրճյան փողոցը»,- նշվում է ՀՓՇ-ի այսօր տարածած հայտարարության մեջ՝ նշելով, որ սկսում են մարզային հանդիպումներ ու հանրահավաքներ, որից հետո արժանապատիվ քաղաքացիները վերստին կվերադառնան Բաղրամյան-Դեմիրճյան փողոցներ:

Ինչ տվեց ճանապարհների արգելափակումն ու դրանց վերացումն արդյոք ընդդիմության թուլության արտահայտությունն էր։ Քաղտեխնոլոգ Կարեն Քոչարյանի դիտարկմամբ՝ փողոցներ փակելը ճնշման մեխանիզմ է, որը օգտագործում են բոլոր ընդդիմադիր ուժերը տարբեր երկրներում:

«Այս անգամ այս միջոցը օգտագործեց նաև Հայաստանի ընդդիմությունը, որպեսզի Փաշինյանը հայտարարի արտահերթ ընտրություններ: Այդ նպատակին իրենք հասել են: Դա բավարար է, թե ոչ, այլ խնդիր է: Բայց որ ճնշումների հետևանքով ինչ-որ պրոցեսներ են եղել, դա փաստ է»,- շեշտեց քաղտեխնոլոգը:

Նա նկատեց, որ հանրահավաքները ազդել են Փաշինյանի որոշման վրա, արտահերթ ընտրություններ անցկացնելու հարցում:

«Փաշինյանը այդ որոշումը կայացրել է ճնշման հետևանքով: Այն մասին, որ ցույցերը ազդել են վարչապետի որոշման վրա, վկայում է նաև այն փաստը, որ դրանից մեկ շաբաթ առաջ Փաշինյանը հայտարարել էր, որ ընտրությունների որևէ պահանջ չկա», - ասաց Կարեն Քոչարյանը:

Հեղինակ՝ Անի Մշեցյան

Աղբյուր` Փաստինֆո