Փաստ ինֆո

Ռոբերտ Քոչարյանի գործով Սահմանադրական դատարան դիմելու գլխավոր դատախազի քայլը իրավաբանական մեկնաբանություն չունի, - «Փաստինֆո»-ի հետ զրույցում ասաց փաստաբան Երվանդ Վարոսյանը՝ նշելով, որ այն չի կարող որեւէ անդրադարձ ունենալ ՀՀ քրեական օրենսգրքի 300.1-րդ հոդվածը հակասահմանադրական ճանաչելու ՍԴ-ի մարտի 26-ի որոշման վրա։

Ինչպես արդեն տեղեկացրել ենք՝ չնայած 300.1-րդ հոդվածը ճանաչվել է հակասահմանադրական, այդուհանդերձ, ՀՀ երկրորդ նախագահ Ռոբերտ Քոչարյանը, նախկին փոխվարչապետ Արմեն Գեւորգյանը, պաշտպանության նախկին նախարար Սեյրան Օհանյանը, ԶՈՒ ԳՇ պետ Յուրի Խաչատուրովը դեռ շարունակում են այդ հոդվածով մնալ մեղադրյալ։ Ավելին՝ դատախազությունը հայտարարել է, թե այդ գործով գլխավոր դատախազը դիմել է ՍԴ, իսկ Ռ.Քոչարյանի եւ մյուսների գործով դատախազներն էլ պատրաստվում են դատաքննությունը կասեցնելու միջնորդություն ներկայացնել դատարանին։

Ե.Վարոսյանի դիտարկմամբ՝ սա ընդամենը փորձ է ժամանակ ձգելու, չընդունելու առկա իրողությունը։

«Առկա իրողությունն այն է, որ Սահմանադրական դատարանի որոշմամբ արդեն իսկ գոյություն չունի քրեական օրենսգրքի այն հոդվածը, որով քրեական հետապնդում է իրականացվում 4 անձի նկատմամբ, այդ քրեական հետապնդումը փաստացի գոյություն չունի։ Եվ այս իրավիճակը չի փոխվի»,- նշել է Ե.Վարոսյանն ու ավելացրել. «այս պարզ ճշմարտությունը դատախազությունը չի ուզում ընդունել եւ փորձում է որեւէ կերպ ժամանակ ձգել։ Եթե անգամ Սահմանադրականության հարց է դատախազությունը նշմարում՝քրեական հետապնդումը դադարեցնելու հետ կապված նորմերում, միեւնույն է հետապնդումը պետք է օր առաջ դադարեցվի։ Որից հետո նոր ինքը ինչ-որ նորմերի մեկնաբանություն կարող է ստանալ»։

Փաստաբանը ընդգծեց՝ անկախ նրանից Սահմանադրական դատարանը կընդունի այս դիմումը, թե ոչ, այս գործի ելքի վրա դա այլեւս ազդեցություն ունենալ չի կարող։

Հեղինակ՝ Անի Մշեցյան

Աղբյուր` Փաստինֆո