Փաստ ինֆո

Երևանի ընդհանուր իրավասության դատարանում՝ դատավոր Աննա Դանիբեկյանի, մեկնարկել է ՀՀ երկրորդ նախագահ Ռոբերտ Քոչարյանի և մյուսների գործով դատական նիստը։

«Փաստինֆո»-ի հաղորդմամբ՝ նախագահող դատավորը դատական նիստի մեկնարկից անմիջապես հետո հայտարարեց, որ դատարանը նախ քննարկման առարկա կդարձնի նախորդ դատական նիստերին պաշտպանության կողմի և դատախազների վարքագիծը։

Ինչպես արդեն տեղեկացրել ենք՝ մարտի 23-ին կայացած դատական նիստի ընթացքում դատարանը սահմանափակել է պաշտպանության կողմի միջնորդություններ ներկայացնելու իրավունքը և հայտարարել դատաքննության փուլի մեկնարկ, ինչից հետո Ռոբերտ Քոչարյանի պաշտպանները լքել են դատական նիստերի դահլիճը։Իսկ նախորդ դատական նիստին՝ մարտի 30-ին, դատարան չեն ներկայացել մեղադրող դատախազները, որոնցից միայն Գևորգ Բաղդասարյանն է հայտնել, որ դատական նիստերին չի ներկայացել՝ կապված ՀՀ ՔՕ 300.1-րդ հոդվածը հակասահմանադրական ճանաչելու ՍԴ որոշման հետ, քանի որ դիրքորոշում ներկայացնելու համար անհրաժեշտ էր ժամանակ։

Դատարանը նախ քննարկեց Ռոբերտ Քոչարյանի պաշտպանների կողմից դատական նիստերի դահլիճը լքելու հանգամանքը։ Արամ Վարդեւանյանը հայտարարեց, որ դատավորի վարքագիծը Քրեական դատավարության որևէ նորմի շրջանակում իր տրամաբանության մեջ չէր տեղավորվում, չքննելով միջնորդությունները՝ դատարանը հախուռն կերպով, անհասկանալի ձևով փորձում էր ամեն կերպ ազդարարել դատաքննության սկիզբ։

«Ես տեղից փորձում էի Ձեզ դիմել, հայտարարությամբ հանդես գալ, Դուք թույլ չէիք տալիս։ Ես այլ միջոց չունեի, այդ իրավիճակում ինձ այլ ելք չէր մնում, քան նման քայլի դիմելը»,- ասաց Վարդևանյանը՝ նշելով, որ փաստաբաններն իրենց իրավունքները պաշտպանելու համար կարող են դիմել նաև օրենքով չարգելված գործողությունների կամ միջոցների, ինչն առկա է միջազգային պրակտիկայում։

Վարդևանյանը հիշեցրեց, որ այդ նիստում հայտարարել է՝ Սահմանադրական դատարանը քրօրենսգրքի 300.1 հոդվածի քննության արդյունքում խորհրդակցական սենյակում էր, մինչդեռ դատավորն անտեսել է։

«Ինձ մոտ կար հիմնավոր կասկած, որ ձեր վրա այդ պահին կար ճնշում, որը պետք է լիցքաթափեր նաև իմ գործողություններով։ Դա նաև հակազդեցություն էր»,- ասաց փաստաբանը։

Հայկ Ալումյանը նշեց, որ երբ դատարանն առաջարկում է ներկայացնել դիրքորոշումը՝ իրենց կողմից ենթադրյալ խախտումների հետ կապված, լավ կլիներ, որ դատարանն ինքն իր կողմից կարգի խախտումը բացառեր։

Ալումյանի խոսքով՝ դատարանը պետք է հայտարարի, թե որ գործն է քննում, քանի որ վերջինս չի կարող հայտարարել, որ որևէ մեկը մեղադրվում է ՀՀ ՔՕ 300.1-րդ հոդվածով, որովհետև դատավորի վրա կծիծաղեն։

«Դուք դատարանը դրել եք ծիծաղելի սուբյեկտի տեղ»,- նշեց Ալումյանը, ինչից հետո դատավորը թույլ չտվեց շարունակել։

Փաստաբան Հովհաննես Խուդոյանն էլ հիշեցրեց, որ նախորդ դատական նիստին պաշտպանության կողմը միջնորդություն էր ներկայացրել՝ գործի վարույթը կասեցնելու և ՍԴ դիմելու մասին, սակայն դատարանն առանց քննելու միջնորդությունը՝ դատաքննության է անցել, ինչը կարմիր լույս վառել։ Ավելին՝ նրա համոզմամբ՝ Խուդոյանն ընդգծեց, որ դատարանի նկատմամբ ահռելի ճնշումներ կան։

Հիշեցնենք՝ սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու համար, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու համար։

Մարտի 26-ին ՀՀ Սահմանադրական դատարանը հակասահմանադրական է ճանաչել ՀՀ քրեական օրենսգրքի 300.1֊րդ հոդվածը՝ այն համարելով ՀՀ Սահմանադրության 78-րդ եւ 79-րդ հոդվածներին հակասող և անվավեր։ Այսինքն՝ դատարանը պետք է այդ հոդվածի մասով դադարեցնի Ռոբերտ Քոչարյանի և մյուսների նկատմամբ քրեական հետապնդումը և կարճի վարույթը։ Սակայն ապրիլի 2-ի դրությամբ քրեական հետապնդումը դեռ չի դադարեցվել։

Հեղինակ՝ Իզաբել Սահակյան

Աղբյուր` Փաստինֆո