Փաստ ինֆո

Երևանի ընդհանուր իրավասության դատարանում՝ դատավոր Աննա Դանիբեկյանի նախագահությամբ, այս պահին քննարկվում է ՀՀ երկրորդ նախագահ Ռոբերտ Քոչարյանի նկատմամբ քրեական հետապնդումը ՀՀ ՔՕ 300.1-րդ հոդվածով դադարեցնելու մասին միջնորդությունը։

Դատավոր Աննա Դանիբեկյանը նշեց, որ պաշտպանության կողմի՝ քրեական հետապնդումը դադարեցնելու մասին միջնորդությունը պետք է քննարկվի դատախազների կողմից ներկայացված՝ գործի վարույթը կասեցնելու և ՍԴ դիմելու մասին միջնորդությունից առանձին։
Փաստաբան Հայկ Ալումյանը ներկայացրեց միջնորդությունը՝ վկայակոչելով ՍԴ որոշումը , համաձայն որի՝ ՀՀ քրեական օրենսգրքի 300.1-րդ հոդվածը ճանաչվել է հակասահմանադրական և անվավեր։ Բացի դա՝ պաշտպանը միջնորդել է նաև վերացնել Ռոբերտ Քոչարյանի նկատմամբ ընտրված խափանման միջոց գրավը կամ նվազեցնել գրավի չափը։

Փաստաբան Արամ Վարդևանյանն էլ ընդգծեց, որ Ռոբերտ Քոչարյանի նկատմամբ խափանման միջոցն առհասարակ ենթակա է վերացման։
Արմեն Գևորգյանի պաշտպան Էրիկ Ալեքսանյանն էլ միջնորդեց՝ դադարեցնել Արմեն Գևորգյանի նկատմամբ քրեական հետապնդումը ՀՀ ՔՕ 300.1-րդ հոդվածի մասով՝ արդարացման հիմքով և այդ մասով կարճել գործի վարույթը։

Դատախազները հայտարարել են, թե առարկում են քրեական հետապնդումը դադարեցնելու միջնորդությանը։ «Փաստինֆո»-ի հաղորդմամբ՝ այս պահին նրանք ներկայացնում են իրենց առարկությունները՝ ըստ այդմ ներկայացնելով գործի վարույթը կասեցնելու հիմնավորումները։

Հիշեցնենք՝ սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու համար, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու համար։

Հեղինակ՝ Իզաբել Սահակյան

Աղբյուր` Փաստինֆո