Փաստ ինֆո

Իմ պաշտպանյալն այս պահին Ձեր կողմից ապօրինի հետապնդման է ենթարկվում մի հոդվածով, որը գոյություն չունի։ Այս մասին Ռոբերտ Քոչարյանի և մյուսների գործով դատական նիստի վերսկսումից հետո հայտարարեց Հայկ Ալումյանը։

Ինչպես արդեն տեղեկացրել ենք՝ այսօրվա դատական նիստում մեղադրող դատախազները հայտարարեցին, որ միջնորդություն ունեն՝ գործով վարույթը կասեցնելու մասին, քանի որ գլխավոր դատախազը այս գործով դիմել է ՍԴ։

Դատարանը, առանց քննարկման առարկա դարձնելու ՀՀ քրեական օրենսգրքի 300.1-րդ հոդվածը ՀՀ ՍԴ-ի կողմից հակասահմանադրական ճանաչելու հիմքով նշված հոդվածի մասով Ռոբերտ Քոչարյանի, Արմեն Գեւորգյանի, Սեյրան Օհանյանի եւ Յուրի Խաչատուրովի նկատմամբ հետապնդումը դադարեցնելու ու քրեական գործի վարույթը կարճելու մասին, ընդմիջում հայտարարեց դատախազների միջնորդությունը պատճենահանելու վերաբերյալ։

Ընդմիջման ընթացքում Յուրի Խաչատուրովը, նրա պաշտպան Միհրան Պողոսյանը, Սեյրան Օհանյանը և նրա պաշտպան Կարեն Մեժլումյանը հեռացան դատական նիստերի դահլիճից, ուստի՝ դատական նիստի վերսկսումից հետո այն կրկին ընդմիջվեց։
Մեկ֊երկու ժամ ընդմիջումից հետո նիստը կրկին վերսկսվեց։ Մեղադրող Գևորգ Բաղդասարյանը հայտարարեց, որ վարույթը շարունակվում է, քանի դեռ դրա վերաբերյալ որոշում չի կայացրել։

Ակնհայտ է, որ քրեական հետապնդումը դադարեցնելու հարցը պետք է քննարկել դատական նիստով, բայց ամբաստանյալների և նրանց պաշտպանների բացակայության պատճառով դատական նիստը չի կարող շարունակվել, մինչդեռ պաշտպանական կողմը գտնում է, որ դատական նիստը պետք է շարունակվի։

Փաստաբան Հայկ Ալումյանն էլ հետաքրքրվեց, թե ամբաստանյալները որ հոդվածով են մեղադրվում, ինչում են մեղադրվում և ինչից է պաշտպանները պաշտպանում նրանց, եթե ՔՕ 300.1֊րդ հոդվածը հակասահմանադրական է ճանաչվել, գոյություն չունի։

«Այս ինչի՞ եք վերածել օրենսդրությունը, ինչ եք վերածել դատարանը»,֊նշեց նա՝ ընդգծելով, որ հենց այս պահին իր պաշտպանյալի նկատմամբ հետապնդում է իրականացվում մի հոդվածով, որը գոյություն չունի։

«Հենց հիմա քրեական հետապնդումը դադարեցրեք՝ ՔՕ 300.1֊րդ հոդվածով»,֊հայտարարեց Ալումյանը։

Պաշտպան Էրիկ Ալեքսանյանն էլ պահանջեց, որ Արմեն Գևորգյանի նկատմամբ արդարացման հիմքով քրեական հետապնդումը դադարեցվի՝ ՀՀ քրեականօրենսգրքի 300.1֊րդ հոդվածով։

«Մի չարաշահեք Ձեր լիազորությունները, մի կատարեք օրինախախտում»,֊հայտարարեց Ալեքսանյանը՝ ավելացնելով, որ դատարանը պարտավոր էր դադարեցնել հետապնդումը դեռևս նախորդ դատական նիստին։

Ավելին՝ պաշտպան Արամ Վարդևանյանն էլ հայտարարեց, որ դատարանը պարտավոր էր դադարեցնել հետապնդումը՝ առանց պաշտպանության կողմի միջնորդության։

Վարդևանյանի խոսքով՝ դատախազները չեն ցանկանում ասել, որ սխալվել են, երեք տարի շարունակ ապօրինի հետապնդում են իրականացրել։

Հիշեցնենք՝ սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու համար, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու համար։

Հեղինակ՝ Իզաբել Սահակյան

Աղբյուր` Փաստինֆո