Փաստ ինֆո

Այսօր դատական նիստի ժամանակ պատասխանող կողմն ասաց, որ վերջում եթե որոշումն էլ ստանան, չեն կատարելու։ Այս մասին լրագրողների հետ զրույցի ժամանակ ասաց ԳՇ նախկին պետ Օնիկ Գասպարյանի փաստաբան Արամ Օրբելյանը։

«Նման մոտեցման դեպքում ցանկացած իրեն հարգող երկրում վարչապետի ներկայացուցիչը, եթե ինքնագլուխ է նման բան արել, աշխատանքից կազատվեր, իսկ եթե ինքնագլուխ չէր արել, վարչապետը գործից կազատվեր։ Բացառվում է, որ ԱԺ-ն վարչապետին դուրս չշպրտեր նման մոտեցման համար։ Եթե վարչապետն ասի՝ որոշումը կա, բայց չի կատարելու, նման մոտցման համար պատասխանատվության պետք է ենթարկվի»,-նշեց փաստաբանը՝ հավելելով, որ դիմել են դատախազություն և ակնկալում են համապատասխան քրեական գործի հարուցում՝ դատարանի ակտը չկատարելու հիմքով։

Հարցին՝ որոշումից հետո Օնիկ Գասպարյանը փորձե՞լ է գնալ Գլխավոր շտաբ, փաստաբանն ասաց, որ Օնիկ Գասպարյանը մի քանի օր ԳՇ-ում աշխատանքի եղել է. «Հիմա աշխատանքի լինում է, թե ոչ, կդժվարանամ մեկնաբանել, որովհետև չեմ հետևում՝ որտեղ է գնում աշխատանքի, թե չի գնում։ Որոշակի տեխնիկական գործընթացներ կան, որ նա որպես ԳՇ պետ կկարողանա արդյունավետ իրականացնել իր գործառույթները, որոնք չեն կատարվում։ Դա է պատճառը, որ հաղորդում ենք ներկայացրել, եթե նման խնդիր չլիներ Օնիկ Գասպարյանը կշարունակեր գործել։ Գիտեմ, որ ակտն ընդունելուց հետո առնվազն մի քանի օր գնացել է գործի, բայց դրանից հետո էլ չեմ հետևել այդ գործընթացներին»,-նշեց Արամ Օրբելյանը։

Վերջինս ընդգծեց՝ վարչապետը, որը գտնում է, որ կարող է դատարանի որոշումը չկատարել և խնդրել դատարանին փոխել որոշումը, պետք է քաղաքական պատասխանատվության ենթարկվի. «Քրեադատավարական հետևանքներ նույնպես պետք է լինեն, որովհետև ՀՀ օրենսդրության համաձայն՝ դատարանի որոշում չկատարելը համարվում է հանցագործություն»,-նշեց փաստաբանը։

Աղբյուր` Փաստինֆո