Փաստ ինֆո

Դատարանին փորձում են համոզել, որ քրեական հետապնդումը դադարեցնի թաքուն՝ խորհրդակցական սենյակում։ Այս մասին ՀՀ երկրորդ նախագահ Ռոբերտ Քոչարյանի և մյուսների գործով դատական նիստին հայտարարեց մեղադրող Գևորգ Բաղդասարյանը։ 

Ինչպես արդեն տեղեկացրել ենք՝ այսօրվա դատական նիստում մեղադրող դատախազները հայտարարեցին, որ միջնորդություն ունեն՝ գործով վարույթը կասեցնելու մասին, քանի որ գլխավոր դատախազը այս գործով դիմել է ՍԴ։
Դատարանը, առանց քննարկման առարկա դարձնելու ՀՀ քրեական օրենսգրքի 300.1-րդ հոդվածը ՀՀ ՍԴ-ի կողմից հակասահմանադրական ճանաչելու հիմքով նշված հոդվածի մասով Ռոբերտ Քոչարյանի, Արմեն Գեւորգյանի, Սեյրան Օհանյանի եւ Յուրի Խաչատուրովի նկատմամբ հետապնդումը դադարեցնելու ու քրեական գործի վարույթը կարճելու մասին, ընդմիջում հայտարարեց դատախազների միջնորդությունը պատճենահանելու վերաբերյալ։
Ընդմիջման ընթացքում Յուրի Խաչատուրովը, նրա պաշտպան Միհրան Պողոսյանը, Սեյրան Օհանյանը և նրա պաշտպան Կարեն Մեժլումյանը հեռացան դատական նիստերի դահլիճից։
Ամբաստանյալների և պաշտպանների բացակայության պայմաններում դատական նիստը շարունակվել չի կարող, սակայն Ռոբերտ Քոչարյանի և Արմեն Գևորգյանի փաստաբանները պնդում են, որ քրեական հետապնդումը պետք է դադարեցվի՝ ՔՕ 300.1֊րդ հոդվածով։
Մեղադրող կողմն էլ համաձայն չէ այդ դիրքորոշմանը՝ ընդգծելով, որ դատական նիստը պետք է հետաձգվի, իսկ դատարանի կողմից պետք է քննարկման առարկա դարձվի դատական նիստերի դահլիճից հեռացած անձանց վարքագիծը։
Գևորգ Բաղդասարյանը գտնում է, որ քրեական հետապնդումը դադարեցնելու և գործի վարույթը կարճելու հարցը պետք է քննարկել դատական նիստով, ինչից հետո դատարանը պետք է հեռանա խորհրդակցական սենյակ, մինչդեռ, ըստ Բաղդասարյանի, պաշտպանության կողմը փորձում է դատարանին համոզել, որ դատարանը թաքուն հեռանա խորհրդակցական սենյակ և թաքուն որոշում կայացնի։ Ըստ Բաղդասարյանի՝ թաքուն որոշում կայացնելը պետք է բացառվի, դա իրավական պետություն չի կարող լինել։
Բաղդասարյանը նշեց, որ իրենք էլ են գտնում, որ ՍԴ որոշումն առաջացրել է 300.1֊րդ հոդվածով քրեական հետապնդումը բացառող հանգամանք, սակայն առկա է սահմանադրականության հարց՝ կապված Քրդատ օրենսգրքի որոշակի դրույթների հետ, ուստի՝ անհրաժեշտ է դիմել ՍԴ։
Բացի դա՝ դատախազը պնդեց, որ ամբաստանյալներն անհարգելի բացակայել են նիստից՝ իրենք իրենց զրկելով այդ իրավունքից։
Ինչ վերաբերում է Կարեն Մեժլումյանի՝ արձակուրդ մեկնելու հանգամանքին, Բաղդասարյանը նշեց, որ Կարեն Մեժլումյանը դիպլոմատը վերցրեց ու հեռացավ նիստերի դահլիճից, ինքը պե՞տք է մտածի, բացի դա, Սեյրան Օհանյանն այլ պաշտպան ունի։
Նախագահող դատավորն արձանագրեց, որ Ռոբերտ Քոչարյանի փաստաբանների՝ քրեական հետապնդումը դադարեցնելու, խափանման միջոց գրավը վերացնելու կամ գրավի գումարի չափը փոփոխելու, ապօրինի հետապնդման համար դատախազներին ներողություն խնդրելուն պարտավորեցնելու մասին միջնորդությունը պետք է քննարկվի այսօր։ Փաստաբանները պնդեցին, որ այս քրեական հետապնդումը դադարեցնելու վերաբերյալ միջնորդության վերաբերյալ դատարանը պետք է հեռանա խորհրդակցական սենյակ և նշված միջնորդությունը քննարկման ենթակա չէ։ Բացի դա՝ փաստաբանները պնդում են, որ իրենց ներկայացրած միջնորդությունը պետք է քննվի դատախազների միջնորդությունից առանձին։
Հիշեցնենք՝ սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու համար, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու համար։

Հեղինակ՝ Իզաբել Սահակյան

Աղբյուր` Փաստինֆո