Փաստ ինֆո

Կոմանդոսի անցած ճանապարհը բոլորի համար պետք է լինի հուշում, որ հայրենիքին ծառայելը պատիվ է,- Արկադի Տեր-Թադևոսյանի հոգեհանգստի ժամանակ լրագրողների հետ զրույցում ասաց ՀՀ ԶՈՒ ԳՇ նախկին պետ Մովսես Հակոբյանը։

Նշենք, որ Երեւանի մարզահամերգային համալիրում այսօր տեղի է ունեցել Կոմանդոսի՝ Արկադի Տեր-Թադեւոսյանի քաղաքացիական հոգեհանգիստը։

Մ.Հակոբյանի խոսքով՝ Կոմանդոսի հետ ծանոթացել են պատերազմի ժամանակ՝ Շուշիի ազատագրումից հետո, դարձել զինակից ընկերներ։ «Որպես զինվորական, որպես հրամանատար՝ ընդունել ենք որպես առաջնորդի։ Իր անցած ճանապարհը բոլորին հուշում է, որ հայրենիքին ծառայելը պետք է լինի պատիվ։ Կոմանդոսն այդ ճանապարհը փառքով է անցել»,- նշել է Հակոբյանը եւ ավելացրել, որ նա մարդկային շփումներում շատ հասարակ էր, բարեհամբույր, սակայն վերջին ժամանակներս նաև «մի քիչ խեղճ էր»։

Անդրադառնալով տարածաշրջանի ապաշրջափակմանը, որի մասին հայտարարում են ՀՀ իշխանությունները՝ Մ.Հակոբյանը նշել է, որ բարդ գործընթաց է, որի ընթացքում պետք է հաշվի առնվի Հայաստանի շահը․ «Ապաշրջափակումը, եթե կատարում է Ադրբեջանի և Թուրքիայի համար, անընդունելի է»։

Հիշեցնենք, որ օրեր առաջ ԱԽՔ Արմեն Գրիգորյանը ձեռնպահ էր մնացել Թուրքիան որպես թշնամական երկիր ներկայացնելու գնահատականներից՝ նշելով, որ պետք է մեր մոտեցումներում շտկումեր մտցվեն՝ հաշվի առնելով տարածաշրջանում տեղի ունեցող զարգացումները։ Լրագրողի հարցին ի պատասխան անդրադառնալով այս հայտարարությանը Մ.Հակոբյանը հայտարարեց, թե համաձայն չէ, որ մեր ընկալումը պետք է շտկումների ենթարկվի։

Աղբյուր` Փաստինֆո