Փաստ ինֆո

ԼՀԿ նախընտրական շտաբն ամենայն հավանականությամբ կգլխավորի Դավիթ Խաժակյանը, - այդ մասին լրագրողների հետ զրույցում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը՝ ավելացնելով, որ շտաբը դեռ չի ձեւավորվել։

Ավելին, նա նշել է, թե ընտրացուցակները եւս դեռ պատրաստ չեն։ «Հիմա շատ վաղ է ցուցակ գրել»,- նշել է Մարուքյանը։

Անդրադառնալով ընտրական օրենսգրքի փոփոխություններին՝ Մարուքյանը նկատել է, որ իշխող խմբակցությունը շատ է քննադատել ընտրական համակարգը, եւ նրանց ելույթներից կարելի է եզրակացնել, որ այս խորհրդարանը լեգիտիմ չի։

«Իշխանությունը նկատեց, որ երբ Շուշին հանձնվեց, իրենց խմբակցությունից 5 մարդ դուրս եկավ։ Մեծամասամբ դա ռեյտինգային ընտրակարգով ընտրված մարդիկ էին, որոնք ունեին մեծ շրջապատ եւ մտածում էին , թե ինչպես են նայելու մարդկանց աչքերին։ Իսկ հիմա բերվում է ընտրակարգ, որով ժողովուրդը ընտրում է վարչապետ, իսկ նա նշանակում է պատգամավորներին։ Սակայն նախ պետք է ընտրվի խորհրդարանը, որը կընտրի վարչապետին։ Սա նրա համար է արվում, որպեսզի եթե վաղը հանձնվի Ստեփանակերտը, ոչ ոք չկարողանա դուրս գալ իրենց խմբակցությունից»,- հայտարարել է Մարուքյանը։

Ըստ նրա՝ այսօր պատգամավորները քննադատում էին այն ընտրակարգը, որով ընտրվել էին։ Մինչդեռ իրենց բոլոր նախկին ելույթներում իշխանությունը նշում էր, որ սա ամենալեգիտիմ խորհրդարանն է։ «Հիմա իրենք ուզում են, որ որեւէ մեկը որեւէ տեղից չընտրվի, այլ ուղղակի կուսակցության ղեկավարի բարի կամքի շնորհիվ մարդը հայտնված լինի ցուցակի այս, կամ այն համարի տակ։ Սակայն կարող եմ ասել, որ իմքայլականների մի մասը, որը այսօր կողմ էր քվեարկել, կհայտնվեն օդում»,- շեշտել է պատգամավորը։
Նա նաեւ ուշադրություն է հրավիրել իշխանության հայտարարությունների վրա, որոնց համաձայն՝ ժողովուրդը խորհրդարան է բերում հանցագործների։

«Այսպիսով` իշխանությունը ուզում է այս ընտրությունները կռիվ դարձնել Փաշինյանի եւ հին իշխանությունների միջեւ։ Ասում են, որ լինելու է գաղափարական պայքար։ Ի՞նչ գաղափարական պայքար, գայլերի եւ գելխեղդների միջեւ։ Դուք նախ պետք է գաղափար ունենաք, նոր այն ներկայացնեք»,- նկատեց Մարուքյանը։

Աղբյուր` Փաստինֆո