Փաստ ինֆո

Ես կմասնակցեմ նախընտրական պրոցեսներին, բայց ինչ ձեւաչափով դեռ ասել չեմ կարող,- այս մասին «Կենտրոն» հեռուստաալիքի եթերում ասել է Ազգային ժողովի աշխատակազմի նախկին ղեկավար, գլխավոր քարտուղար Արա Սաղաթելյանը:

«Մեզ մոտ գնում են քննարկումներ, որոնք վաղուց են սկսվել, սակայն մի բան միանշանակ է՝ իշխանությունները պետք է հեռանան։ Կմասնակցենք մենք ընտրություններին, թե չմասնակցելով հանրությանը կներկայացնենք այս իշխանությունների տգիտությունը եւ վնասը, դեռ չգիտեմ»,-նշել է Սաղաթելյանը։

Նրա փոխանցմամբ՝ քաղաքական ուժերը ընտրությունները դիտարկում են որպես Փաշինյանին հեռացնելու միջոցներից մեկը։

«Ես չեմ վստահում իրենց կազմակերպած ընտրություններին։ 2018 ընտրությունները կազմակերպվել են վարչական ռեսուրսի մեծ ներգրավմամբ։ Չեմ կարող ասել այն ժամանակ ընտրությունները կեղծվել են, թե ոչ, բայց վստահ եմ, որ այս անգամ կկեղծվեն։ Քանի որ Նիկոլ Փաշինյանը եւ նրա թիմը կեղծում են ամեն ինչ եւ չեն կատարում իրենց խոստումները։ Փաշինյանը ստախոս է իր բնույթով, արցախյան պատերազմի ժամանակ նա 44 օր մեզ խոստանում էր հաղթանակ, բայց տարավ մեզ պարտության։ Ես վստահ եմ, որ այս ընտրությունների ժամանակ փորձեր են արվելու գողանալու ժողովրդի քվեն», - նշեց Սաղաթելյանը։

Նա նաեւ նկատել է, որ վարչական ռեսուրսը թույլ է տալիս իշխանություններին նվազագույն ռիսկերով հասնել իրենց նպատակին։

Սաղաթելյանն անդրադարձել է նաև իր դեմ հարուցված քրեական գործին՝ նշելով, որ դա քաղաքական գործ է։

«Այդ գործը զուրկ է փաստերից եւ իմ համոզմամբ այն ստեղծվել է Նիկոլ Փաշինյանի եւ իր թիմակիցների կողմից՝ իրենց սպասարկող մարդկանց միջոցով։ Չեմ կարող ասել, թե ինչու է գործը հարուցվել հենց իմ դեմ, բայց կարծում եմ, որ նրա երեւակայության մեջ իմ քաղաքական ներգրավվածության մեջ նա մեծ ռիսկեր է տեսնում»,- շեշտեց նա։

Սաղաթելյանը նկատել է, որ այսօր դատարանները գտնվում են ճնշան տակ, սակայն դատավորները կիրթ մարդիկ են, եւ պաշտպանների նպատակն է հասկացնել իրենց, որ կատարելով քաղաքական պատվերն իրենք հետագայում կհայտնվեն շատ վատ իրավիճակում։

Աղբյուր` Փաստինֆո