Փաստ ինֆո

Խորհրդարանական արտահերթ ընտրությունները մեր երկրի պետականության, ինքնիշխանության եւ ժողովրդավարության մեծագույն քննությունն է,- այս մասին Ազգային ժողովի արտահերթ նիստում հայտարարել ՀՀ ԱԺ պատգամավոր Արման Բաբաջանյանը։ 

Ըստ նրա՝ այս փուլում այդ ընտրությունը մեր պետականության պահպանման եւ ամրապնդման համար իրական պատերազմ է, որին գնում ենք անպատրաստ, Ընտրական օրենսգրքի չնչին փոփոխությամբ։

«Մենք գնում ենք մեր պետության ամենաճակատագրական ընտրության, նախորդ հանցավոր ռեժիմներին ծառայած ընտրական հանձնաժողովներով եւ մեր ժողովրդավարությանը եւ պետականությանը ձեռնոց նետած հրեշավոր դատական համակարգով։ Հենց ընտրական ակտի այս գործընթացների փուլում կարծում եմ նշանակալի է Սահմանադրական դատարանի դերը կրկին ներկայացնել որպես դատական համակարգի խորհրդանիշ։ Եվ այդ համատեկստում մեծ նշանակություն ունի վերջին ՍԴ-ի որոշումը, ի օգուտ գլխավոր անբաստանյալի։ Այդ դատարանը կոչված է պաշտպանել մեր երկրի Սահմանադրական կարգը։

Իսկ ձեր ընտրած դատավորների շնորհիվ այդ դատարանը պաշտպանեց Սահմանադրական կարգը տապալողին, եւ այդ որոշմամբ, ըստ էությանբ, տապալեց Սահմանադրական կարգը»,- ասաց պատգամավորը։

Բաբաջանյանը նկատեց, որ իշխանությունը ուներ երկու տարի՝ դատական իշխանությունը առողջացնելու համար։

«Այսպիսի դատական համակարգով գնալ ընտրությունների պարզապես արկածախնդրություն է։ Դուք չկարողացաք պաշտպանել մեր ժողովրդի իշխանությունը, ժողովուրդը ինքը վերջին չորս ամիսների ընթացքում դուրս եկավ եւ իր իշխանությունը պաշտպանեց։ Մեր այս ընտրությունը Հանրապետության եւ Կայսրության միջեւ է։ Եվ ես շատ եմ ուզում, որ ՀՀ Ազգային ժողովը անի ամեն ինչ, որպեսզի հաղթի հանրապետությունը»,-հայտարարեց նա։

Աղբյուր` Փաստինֆո