Փաստ ինֆո

Ձվի շուկայում գնի անկում կա։ Կառավարությունում լրագրողների հետ զրույցի ժամանակ այս մասին ասաց տնտեղական մրցակցության պաշտպանության պետական հանձնաժողովի նախագահ Գեղամ Գևորգյանը։

«Ըստ մեր նախնական վերլուծությունների՝ որոշակի օբյեկտիվություն կա գնի բարձրացման հետ կապված, բայց մենք չենք փաստում, որ գնի այսչափ բարձրացումն է օբյեկտիվ։ Դա չի նշանակում, որ ձուն ներմուծվում է Հայաստան։ Շատ գործընկերներ ասում են՝ ինչու է ձվի գնի բարձրացումը կապվում համաշխարհային շուկայում տեղի ունեցող փոփոխությունների հետ, որովհետև ձու ածող հավերի կերը ներմուծվում է արտասահմանից։ Հավի կերը ներկրվում է, որն ամբողջ աշխարհում թանկացել է՝ կապված կորոնավիրուսի հետ։ Դա չի նշանակում, որ ձվի գնի այսչափ բարձրացումը համաչափ է։ Գերիշխող դիրքի չարաշահման հիմքով վարույթ ենք սկսել, կարող է դիտարկվել արհեստական դեֆիցիտի փորձ, կարող է դիտարկվել գերիշխող սուբյեկտների կողմից գնի բարձրացում»,-նշեց ՏՄՊՊՀ նախագահը։

Հարցին՝ Զատիկից հետո ձվի գինը կիջնի՞, Գեղամ Գևորգյանը նշեց, որ վարույթը չի կարող մեկ օրում տեղի ունենալ և չի կարող ասել, թե երբ կիջնի ձվի գինը. «Ես չեմ կարող զանգել ձու արտադրողին և ասեմ գինն իջեցնեն կամ բարձրացնեն։ Հաշվի առնելով Զատիկը և քաղաքացիների լայն հետաքրքրությունը՝ իրականացրել ենք գործողություններ, որոնք մեր մարմնի համար ստանդարտ չեն համարվում։ Ե՛վ ցանցերի հետ ենք խոսակցություններ ունեցել, և՛ ձու արտադրողների հետ, ինչի արդյունքում և՛ ձվի էական պաշար մտավ շուկա, և՛ գինը որոշակի առումով իջավ»,-ասաց Գեղամ Գևորգյանը։

Աղբյուր` Փաստինֆո