Փաստ ինֆո

Կառավարության այսօրվա նիստում հավանության արժանացավ ՀՀ բարձրագույն ուսումնական հաստատություններ ընդունելության կարգում փոփոխություններ կատարելու նախագիծը։ 

Առաջարկվող կարգով ընդունելությունը կիրականացվի երկու փուլով։ ՀՀ ԿԳՄՍ նախարար Վահրամ Դումանյանը նշեց, որ առաջին փուլում դիմորդները կընտրեն մեկ բուհ և կոնկրետ մեկ մասնագիտություն, էլեկտրոնային տարբերակով կլրացնեն հայտը, որից հետո կանցկացվի մրցույթ. «Մրցույթի արդյունքներից հետո ըստ համապատասխան մասնագիտությունների և բուհերի կհայտարարվի թափուր մնացած տեղերի քանակը։ Այն դիմորդները, որոնք առաջին փուլի ժամանակ չեն ընդունվել, երկրորդ փուլով հնարավորություն կունենան դիմել 6 տարբեր մասնագիտությունների համար, որոնք պահանջում են այն քննությունները, որոնք նրանք արդեն հանձնել են»,-նշեց նախարարը։

Վերջինս հավելեց, որ ի տարբերություն նախորդ տարվա՝ այս տարի երկու քննություն կանցկացվի։ Վահրամ Դումանյանը նկատեց, որ նախորդ տարի ընդունելության ժամանակ առաջացած խնդիրների մի մասը կապված էր մրցույթի անցկացման հետ, քանի որ մեկ գնահատականով մրցույթ անցկացնելը լրացուցիչ խնդիրներ է առաջացնում. «Հայտերի լրացումը նույնն է, պարզապես ձևը հստակ է դրված, որ դիմորդները հստակ իմանան՝ առաջին փուլով դիմելու են մեկ բուհ մեկ մասնագիտության համար և դրանով ավարտվում է ընդունելությունը, իսկ երկրորդ փուլը կարող է տեղի ունենալ թափուր մնացած տեղերի պարագայում»։

Նախարարը հավելեց, որ այս տարի առկա է 2918 անվճար և 22300 վճարովի տեղ։

Աղբյուր` Փաստինֆո