Փաստ ինֆո

«Խոսելով Անկարայի հետ մեր հարաբերությունների վերանայման մասին ՝ պետք է հասկանալ ՝ արդյո՞ք Թուրքիան մտադիր է համագործակցել մեզ հետ, թե՞ նա մեզ համարում է իր ենթական», - այս մասին «Փաստինֆո»- ի հետ զրույցում ասել է քաղաքագետ Ալեքսանդր Մարգարովը։

Նա արձանագրել է, որ Հայաստանը միշտ կողմնակից է եղել առանց նախապայմանների սահմանների բացմանը, իսկ նախապայմանները միշտ առաջ է քաշել Թուրքիան:

«Իշխող ուժի նախընտրական ծրագրում Թուրքիայի հետ համագործակցությունը խորացնելու մասին ոչինչ չի եղել: Ավելին, գոյություն ունի նաև հաստատված ազգային անվտանգության ռազմավարություն, որտեղ մանրամասնորեն ներկայացված են Հայաստանի առջև ծառացած մարտահրավերները։ Այժմ իշխանությունները փորձում են գործընկերային դիրքերից հանդես գալ՝ Թուրքիայի, և Ադրբեջանի հետ հարաբերության հարցերում: Նախկինում դա չի նկատվել»,- նշել է քաղաքագետն ու ավելացրել. «Այո, մենք միշտ ճիշտ ենք համարել զարգացնել մեր հարաբերությունները բոլոր հարևանների հետ, բայց դա պետք է լինի գործընկերային հիմունքներով։ Ընդ որում ՝ մյուս կողմը նույնպես պետք է ցուցաբերի կառուցողականություն և հետաքրքրություն»:

Քաղաքագետը նաեւ նկատեց, որ Հայաստանը բազմիցս նշել է, որ Թուրքիան եւ Ադրբեջանի կոնֆլիկտներ հրահրող պետություններ են, եւ խաթարում են տարածաշրջանում անվտանգությունը։

«Միթ՞ե արցախյան պատերազմից հետո մեր մոտեցումները փոխվել են։ Կրկնում եմ, մենք բազմիցս նշել ենք, որ պատրաստ ենք համագործակցել, բայց այդ համագործակցությունը չպետք է հարված հասցնի Հայաստանի պետական ազգային եւ անվտանգության շահերին», - եզրափակել է Մարգարովը։

Հեղինակ՝ Անի Մշեցյան

Աղբյուր` Փաստինֆո