Փաստ ինֆո

Ալեն Սիմոնյանն իրավաբան է և բառերն օգտագործելիս պետք է ճիշտ օգտագործի, որովհետև լեգիտիմությունն իրավաբանական տերմին է և մենք լեգիտիմ պատգամավորներ ենք, ստացել ենք պատգամավորի մանդատ ԿԸՀ-ից և հանրության քվեի արդյունքում։ Այս մասին լրագրողների հետ զրույցում ասաց ԱԺ անկախ պատգամավոր Թագուհի Թովմասյանը՝ անդրադառնալով Ալեն Սիմոնյանի հայտարարությանը, թե խմբակցությունից դուրս եկած պատգամավորների աշխատանքը ոչ լեգիտիմ է։ 

«Երկրորդ՝ ես ընտրվել եմ ռեյտինգային ընտրակարգով և հավաքել եմ շատ մարդկանցից եռակի-քառակի անգամ ավել ձայն։ Այսինքն՝ անհատապես իմ անվան դիմաց մարդիկ նշել են»,-նշեց Թովմասյանը՝ հավելելով, որ պետք է համեմատել, թե ով է ավելի հանրօգուտ գործով զբաղվում և ինչով են զբաղված իշխանական պատգամավորները։

Թովմասյանը նշեց, որ իրենք (անկախ պատգամավորները հեղ.) պատգամավորի լծակները փորձում են ծառայեցնել հանրային լայն շահերին և այժմ աշխատանքային ընթացակարգով խորհրդարանին ներկայացված է Արցախի ապագային վերաբերող հայտարարության նախագիծ։

«Հիմա թող իշխանականները նստեն, հատ-հատ կարդան և փորձեն հասկանալ, թե ինչ ենք մեն ուզում։ Գիտեք, այսօրվա խորհրդարանը պատմության մեջ մնալու է ամենախայտառակ էջով, որ մենք Արցախը հանձնող իշխանության պարլամենտական երկրի խորհրդարան ենք և այս խորհրդարանը պետք է գնահատական տա, թե Արցախի ապագան ինչպես է պատկերացնում, մենք ինչ ենք հասկանում Արցախ ասելով, որտեղից է սկսվում Արցախի սահմանը, ի վերջո, Արցախը տվեցինք և վե՞րջ, թե Արցախի համար դեռ կռիվ ունենք տալու»,-նշեց Թովմասյանը՝ հավելելով, որ այդ հարցերը բարձրացվել են հայտարարության տեքստում և իշխանականները շատ լուրջ քննություն ունեն անցնելու, պետք է իրենց գնահատականը տան՝ քվեարկելով։

Ինչ վերաբերում է իշխանական պատգամավորների պնդումներին, թե Թովմասյանի օգտին քվեարկել են քաղաքացիները, քանի որ «Իմ քայլով» է ներկայացել, Թովմասյանը նշեց, որ ինքը որ կուսակցությունով էլ դներ, այդքան ձայն կստանար, բայց որևէ այլ կուսակցությամբ չէր առաջադրվի, քանի որ երբևէ մտադրություն չի ունեցել քաղաքականությամբ զբաղվելու, պարզապես հեղափոխական ոգևորությամբ ցանկացել է երկրի համար մի լավ բան անել։

«Հիմա էլ՝ բազմաթիվ կուսակցություններից առաջարկ ունեմ, որ կուսակցությունով էլ գնամ՝ պատգամավոր եմ դառնալու, թող հանգստանան։ Ես կորոշեմ՝ ընդհանրապես այս քաղաքական միջավայրում, այս զզվելի միջավայրում ուզու՞մ եմ շարունակել իմ գործունեությունը՝ որպես պատգամավոր, թե չէ, որտեղ մարդիկ կասկածի տակ են դնում ցեղասպանության ճանաչման կամ ընդհանրապես ցեղասպանության հարցն էլ շուտով կասկածի տակ են դնում, կասկածի տակ են դնում մեր հայրենիքի սահմանները, Քարվաճարը հայկական է, թե ոչ։ Ես մտածելու բան ունեմ՝ ուզում եմ ընդհանրապես լինել քաղաքական մի միջավայրում, որտեղ իշխում է այս մթնոլորտը»,- նշեց Թովմասյանը։

Աղբյուր` Փաստինֆո