Փաստ ինֆո

ՀՀ քննչական կոմիտեն արձագանքել է Գեղարքունիքի մարզային քննչական վարչության քննիչ, պատերազմի մասնակից Անդրանիկ Անտոնյանին աշխատանքից ազատելու մասին «Փաստինֆո»-ի հրապարակմանը։

ՔԿ տեղեկատվության և հասարակայնության հետ կապերի բաժնից հավաստացիացրել են, որ այս պահին Անդրանիկ Անտոնյանը շարունակում է զբաղեցնել ՀՀ քննչական կոմիտեի Գեղարքունիքի մարզային քննչական վարչության ավագ քննիչի պաշտոնը: Մինչդեռ, մեր հավաստի տեղեկություններով, մարտի 29-ին ՀՀ քննչական կոմիտեում տեղի է ունեցել կարգապահական հանձնաժողովի նիստ՝ ՔԿ նախագահի տեղակալ Արսեն Այվազյանի նախագահությամբ, որի ժամանակ էլ քննիչին տեղեկացրել են, որ բավարարվել է նրան աշխատանքից ազատելու մասին ՔԿ նախագահի միջնորդությունը։ Ավելին՝ Գեղարքունիքի մարզային քննչական վարչությունում քննիչին զգուշացրել են, որ իր վարույթում առկա գործերը նախապատրաստի՝ հանձնելու համար։

Եթե Կարգապահական հանձնաժողովը՝ նիստից մեկ օր հետո փոխել է ՔԿ նախագահի միջնորդությունը բավարարելու որոշումը ու մերժել այն, ապա դա արդեն այլ հարց է։ Նկատենք, որ քննիչն իրավունք ունի ծանոթանալու իր վերաբերյալ կարգապահական վարույթի նյութերին։

Հիշեցնենք, որ աշխատանքից ազատված քննիչը պատերազմի առաջին իսկ օրերից՝ սեպտեմբերի 29-ից կամավորագրվել եւ մասնակցել է պատերազմական գործողություններին։ 40 օր շարունակ քննիչը եղել է ամենաթեժ կետերում՝ սեպտեմբերի 29-ից մինչև հոկտեմբերի 25-ը եղել է Եղնիկներում, որից հետո մասնակցել է Սղնախի, Քարին տակի, Շուշիի մարտերին։

Նա Շուշիից վերադարձել է նոյեմբերի 7-ին։ Մահվան ու կռվի միջով անցած քննիչը պարզվում է չպետք է ունենա սեփական կարծիքը՝ Փաշինյանի ստեղծված «ժողովրդավարական» երկրում ու Նիկոլ Փաշինյանին քննադատող գրառմամբ ֆեյսբուքյան էջում կիսվելու համար նրա հարցը քննարկման առարկա է դարձվել կարգապահական հանձնաժողովի նիստում՝ որպես պատժի տեսակ ընտրվելով աշխատանքից հեռացումը։

Աղբյուր` Փաստինֆո