Փաստ ինֆո

Մարդիկ, որոնք պատասխանատու են այս պրոցեսի համար, ինչ-որ լծակներով, ազդեցությամբ կամ սպառնալիքներով փորձել են Ձեզ ներքաշել այս պրոցեսների մեջ՝ այսօր լքել են Ձեզ։ ՀՀ երկրորդ նախագահ Ռոբերտ Քոչարյանի և մյուսների գործով դատական նիստի ժամանակ հայտարարել է պաշտպան Հովհաննես Խուդոյանը՝ դիմելով դատավոր Աննա Դանիբեկյանին։

«Անկեղծ չեմ ցանկանում, որ Դուք մտածեք, որ մենք ցանկանում ենք Ձեզ վիրավորել կամ նեղացնել՝ ինչ -որ բանով։ Ի վերջո՝ ՍԴ որոշումը նախ և առաջ Ձեր վիճակն է բարելավում, որովհետև այս պրոցեսը, որն ընթացել է այսքան երկար ժամանակ և այսքան ապօրինի, հնարավորություն է տվել իրավական ճանապարհով փակել»,- նշեց Խուդոյանը։

Ինչպես արդեն տեղեկացրել ենք՝ Երևանի ընդհանուր իրավասության դատարանում ՀՀ երկրորդ նախագահ Ռոբերտ Քոչարյանի և մյուսների գործով դատական նիստին չէր ներկայացել մեղադրող կողմը։ Մեղադրող դատախազներից Գևորգ Բաղդասարյանը գրավոր դիմում էր ներկայացրել դատարան՝ խնդրելով հետաձգել դատական նիստը՝ հայտարարելով, թե ՍԴ որոշմանը ծանոթանալու և դիրքորոշում հայտնելու համար ժամանակ է անհրաժեշտ։ Դատարանը որոշել է հետաձգել դատական նիստը՝ մինչև ապրիլի 2-ը։ Մինչդեռ՝ պաշտպանական կողմի պնդմամբ՝ դատարանը պարտավոր էր դադարեցնել քրեական հետապնդումը ՍԴ որոշումից հետո։

Փաստաբան Հովհաննես Խուդոյանը, անդրադառնալով դատախազների բացակայությանը, ընդգծեց, որ այդ մարդիկ՝ մեղադրողները, որոնք հեղինակել են մեղադրանքը, որոնց պարտականությունն է հետևել ՀՀ-ում օրենքի գերակայությանը, որոնց պարտականությունն է հետևել, որ ՀՀ-ում ոչ մի անմեղ մարդ քրեական հետապնդման չենթարկվի, ունենալով ակնհայտ հիմք մեղադրանքից հրաժարվելու, այս դատական նիստին չեն ներկայացել՝ ակնհայտ անհարգալից վերաբերմունք ցուցաբերելով։

Փաստաբանի խոսքով՝ եթե պաշտպանական կողմն ունենար միջնորդություն, որը ներկայացնելու համար լրացուցիչ ժամանակի անհրաժեշտություն կունենային՝ կներկայանային դատական նիստին և կխնդրեին դատարանից այդ ժամանակը։ Ըստ Խուդոյանի՝ դատախազները շատ լավ գիտակցելով, որ իրավական այլ գործիք չունեն մեղադրանքից հրաժարվելու, ամբողջ պատասխանատվությունը փորձել են թողնել դատավորի վրա։

«Այստեղ Դուք նեղանալու տեղ ունեք, որովհետև իրենց պարտականությունն է հրաժարվել իրենց ապօրինի մեղադրանքից, հետո միայն դատարանի պարտականությունն է սեփական վարույթով սեփական նախաձեռնությամբ դադարեցնել քրեական հետապնդումը։ Այս գործողություններով իրենք Ձեզ ցանկանում են դրդել կատարել մի արարք, որը քրեորեն հետապնդելի է։ Դուք քրեական իրավունքով մասնագիտացված բազմաթիվ տարիների մասնագիտական փորձ ունեցող դատավոր եք, շատ լավ պատկերացնում եք նման արարքի քրեաիրավական գնահատականը։ Ձեզ խնդրում ենք՝ տուրք չտալ նման վարքագծին»,- նշեց Խուդոյանը՝ դիմելով դատավոր Աննա Դանիբեկյանին։

Հիշեցնենք՝ սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու համար, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու համար։

Մարտի 26-ին ՀՀ Սահմանադրական դատարանը հակասահմանադրական է ճանաչել ՀՀ քրեական օրենսգրքի 300.1֊րդ հոդվածը՝ այն համարելով ՀՀ Սահմանադրության 78-րդ եւ 79-րդ հոդվածներին հակասող և անվավեր։ Այսինքն՝ դատարանը պետք է այդ հոդվածի մասով դադարեցնի Ռոբերտ Քոչարյանի և մյուսների նկատմամբ քրեական հետապնդումը և կարճի վարույթը, մինչդեռ դատախազները չէին ներկայացել դատական նիստին՝ միջնորդելով այն հետաձգել։

Հեղինակ՝ Իզաբել Սահակյան

Աղբյուր` Փաստինֆո