Փաստ ինֆո

Հայկական կողմը մշտապես հայտարարել է և շարունակում է հայտարարել, որ Թուրքիայի հետ առանց նախապայմանների երկխոսության մշտապես պատրաստ է, եթե Թուրքիան այդ ուղղությամբ քայլ ձեռնարկի:Այս մասին «Փաստինֆո»-ի հետ զրույցում ասել է «Իմ քայլը» խմբակցության պատգամավոր, ադրբեջանագետ Տաթևիկ Հայրապետյանը:

«Նախորդ նախաձեռնությունները, այդ թվում Ցյուրիխյան հայտնի արձանագրությունները և ֆուտբոլային դիվանագիտությունը ձախողեց թուրքական կողմը, և եթե իրենք շահագրգռություն ունեն հարաբերությունների կարգավորման վերաբերյալ, ապա մենք պատրաստ են առանց նախապայմանների քննարկել դա»,-ասաց պատգամավորը:

Անդրադառնալով պաշտոնյանների՝ հայ-թուրքական հարաբերություններում մոտեցումներ փոխելու վերաբերյալ հայտարարություններին, զրուցակիցը ընդգծեց, որ ստեղծված իրավիճակում չի պատկերացնում հանրային տրամադրությունների ընկալումների փոփոխության մասին.

«Ես չգիտեմ՝ ինչ մոտեցումների մասին է խոսքը, եթե ընդհանուր արտաքին քաղաքական վեկտորների մասին է, ապա դա արտահայտվում է նախարարի ելույթներում, հրապարակված մամլո հաղորդագրություններում, նաև վարչապետի կողմից է արտահայտվում: Եթե խոսքը հանրային տրամադրությունների խորքային փոփոխությունների մասին է, մենք շատ խաղաղասեր ժողովուրդ ենք և խնդիր չունենք որևէ ազգի հետ, իրենք են մշտապես խնդիրներ ունեցել մեզ հետ, իրենք են ագրեսիա ձեռնարկել, իրենք են պատճառ դարձել բազմաթիվ զոհերի և կորուստների, և դրանից հետո իրենք են շարունակում ադրբեջանական կողմում գերեվարության մեջ պահել մեր հայրենակիցներին, այս պայմաններում ես չգիտեմ՝ ինչպես պետք է խոսվի հանրային տրամադրությունների ընկալումների փոփոխության մասին»,,-ասաց Հայրապետյանը:

Ադրբեջանագետ-պատգամավորն ընդգծում է, որ խաղաղությունը միակողմանի չի լինում, հայկական կողմը մշտապես էլ հանդես է եկել կառուցողական դիրքերից,որոնք հակառակ կողմից արձագանք չեն ստացել:

ԱԽՔ Արմեն Գրիգորյանը Հանրային հեռուստաալիքին տված հարցազրույցի ժամանակ, ձեռնպահ էր մնացել Թուրքիային թշնամի երկիր ներկայացնելու գնահատականից՝ նշելով, որ Թուրքիայի նկատմամբ մեր մոտեցումներում որոշակի շտկումներ պետք է լինեն։

Իսկ վարչապետ Նիկոլ Փաշինյանն էլ հայտարարել է, որ եթե մենք դադարենք ընկալել Թուրքիան որպես թշնամական պետություն, ապա Անկարայի վերաբերմունքը նույնպես կփոխվի: Դիտարկմանը, որ հայկական կողմը մշտապես կողմ է եղել հարևանների հետ ճանապարհների ապաշրջափակմանը, սակայն առանց նախապայմանների, իսկ Թուրքիան որպես նախապայման առաջարկել է Հայկական հարցի, Արցախի անկախությունից հրաժարում, արդյոք սա նշանակում է, որ Հայաստանի իշխանություններն ընդունում են Թուրքիայի առաջ քաշած նախապայմանները, եթե մտածում են «շտկել» մոտեցումները՝ իմքայլական պատգամավորն արձագանքեց.

«Ես չգիտեմ՝ Թուրքիան ինչպիսի քաղաքականություն կվարի, այսինքն՝ կարող եմ ենթադրել իրենց շեշտադրումներից, բայց մեր դիրքորոշումը հետևյալն է՝ առանց նախապայմանների պատրաստ ենք երկխոսել հարաբերությունների կարգավորման շուրջ, նախապայմանների ձևով նման քաղաքականությանը մենք կողմնակից չենք, և այդ ուղղությամբ չենք շարժվում, թե հետագայում ինչ կփոխվի, ինչ դիրքորոշումներ կփոխվեն, չեմ կարող ասել»:

Պատգամավորը նաև նշեց, որ «Իմ քայլը» իր նախընտրական ծրագրում հստակ նշել է՝ առանց նախապայմանների հարաբերությունների կարգավորում և, իհարկե, ցեղասպանության հարցը և ճանաչումը շարունակում է կարևոր տեղ զբաղեցնել մեր արտաքին քաղաքական օրակարգում:

Աղբյուր` Փաստինֆո