Փաստ ինֆո

ՀՀ երկրորդ նախագահ Ռոբերտ Քոչարյանի պաշտպանական թիմը մարտի 27-ին միջնորդություն է ներկայացրել դատարան՝ Ռոբերտ Քոչարյանի նկատմամբ քրեական հետապնդումը դադարեցնելու և գործի վարույթը կարճելու մասին։ Այս մասին Ռոբերտ Քոչարյանի և մյուսների գործով դատական նիստին ասել է պաշտպան Հայկ Ալումյանը՝ նշելով, որ միջնորդությունը դատարանի էլեկտրոնային հասցեին է ուղարկվել։

«Հավանաբար Ձեզ հայտնի է, եթե ոչ, ապա ասեմ, որ մարտի 26-ին ՀՀ սահմանադրական դատարանը ՀՀ քրեական օրենսգրքի 300.1-րդ հոդվածը ճանաչել է ՀՀ սահմանադրության 78-րդ եւ 79-րդ հոդվածներին հակասող ու անվավեր։ Այդ օրվանից ՀՀ քրեական օրենսգրքում 300.1-րդ հոդված գոյություն չունի»,- ընդգծել է Հ.Ալումյանն ու ավելացրել, որ դատարանին ներկայացված միջնորդությամբ պահանջել են ՀՀ քրեական օրենսգրքի 300.1-րդ հոդվածով քրեական հետապնդումը դադարեցվի, վարույթը կարճվի, խափանման միջոցը փոխվի եւ քրեական հետապնդումը իրականացնող մարմիններին պարտավորեցնել գրավոր ներողություն հայցել։

Նա ընդգծել է, որ իր պաշտպանյալի նկատմամբ հետապնդում է իրականացվում մի հոդվածով, որն արդեն գոյություն չունի, ու դատարանը քրեական հետապնդումը վերացանելու փոխարեն քննարկում է դատական նիստը մեկ շաբաթով հետաձգելու հարցը։

«Դուք պատկերացնու՞մ եք ինչ իրավախախտում եք անում »,- նշեց նա՝ հավելելով, որ կարող է ասել, որ դատարանը հանցանք է կատարում։ Ավելի կոշտ դիրքորոշում Ալումյանը չցանկացավ հայտնել՝ նշելով, որ չի ցանկանում նման հայտարարություններ անել ոչ թե դատավորի, այլ՝ դատարանի հասցեին։

«Դուք պատկերացնում եք, թե դրա տակից կարող եք դու՞րս գալ»,- նշեց փաստաբանը՝ հավելելով, որ դատարանը պատրաստվում է ևս մեկ շաբաթ ապօրինի հետապնդում իրականացնել իր պաշտպանյալի նկատմամբ, մինչև՝ դատախազներն իրենց դիրքորոշումը հայտնեն։
Փաստաբան Արամ Վարդևանյանն էլ շարունակեց գործընկերոջ խոսքը՝ նշելով, որ դատարանը քրեական հետապնդումը դադարեցնելու մասին որոշում

կարող է կայացնել ոչ միայն խորհրդակցական սենյակում, այլև՝ հենց ՍԴ որոշումից անմիջապես հետո։ Վարդևանյանն ընդգծեց, որ դատարանն առաջնորդվում է ՀՀ քրեական օրենսգրքով, որում այժմ այլևս չկա այդ հոդվածը, այլ՝ պետք է մտածենք՝ Գևորգ Բաղդասարյանը ինչ է մտածում։
«Չկա օրենսգքում այդ հոդվածը, էլ ինչու պետք է ճնշվեք»,- հայտարարեց փաստաբանը։

Նշենք, որ նախորդ դատական նիստին դատարանը հայտարարել էր դատաքննության փուլի մեկնարկ, սակայն դատական նիստը հետաձգվել էր, քանի որ պաշտպանները լքել են դատական նիստերի դահլիճը՝ բոյկոտելով նիստը, ուստի՝ դատախազները չեն հրապարակել մեղադրական եզրակացությունը։

Հատկանշական է, որ դատարանի կողմից հապճեպ կարգով դատաքննության փուլին անցնելուն հաջորդել է ՍԴ որոշումը, համաձայն որի՝ ՀՀ քրեական օրենսգրքի 300,1֊րդ հոդվածը ճանաչվել է Սահմանադրությանը հակասող և անվավեր։ Այսինքն՝ դատարանը պետք է այդ հոդվածի մասով դադարեցնի Ռոբերտ Քոչարյանի և մյուսների նկատմամբ քրեական հետապնդումը և կարճի վարույթը, մինչդեռ դատախազներն այսօրվա դատական նիստին չեն ներկայացել։

Հիշեցնենք՝ սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։
Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու համար, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու համար։

Հեղինակ՝ Իզաբել Սահակյան

Աղբյուր` Փաստինֆո