Փաստ ինֆո

Հետպատվաստումային կողմնակի ռեակցիաները վիճակագրությունը հաշվում է և կլինիկական, և հետկլինիկական փորձաքննությունների արդյուքնում։ Կան սպասվող և անսպասելի ռեակցիաներ։ Այս մասին լրագրողների հետ զրույցում հայտարարեց ԱՆ հիվանդությունների վերահսկման և կանխարգելման ազգային կենտրոնի տնօրենի տեղակալ Գայանե Սահակյանը՝ անդրադառնալով «AstraZeneca» ընկերության պատվաստանյութին, որից հրաժարվել են Եվրոպական մի շարք երկրներ, իսկ Հայաստանի Հանրապետություն է ներկրվել առաջին խմբաքանակը՝ 24 հազար դեղաչափ:

«Սպասվող ռեակցիաների դեպքում խոսքը նրա մասին է, որ ներարկման տեղում կարող է առաջանալ որևէ ռեակցիա՝ ցավ, այտուց, ընդհանուր թուլություն։ 40-50 տոկոսում կարող են այդպիսի բաներ առաջանալ՝ կլինիկական փորձաքննության արդյունքում։ Մեր փորձը ցույց է տալիս, որ դա արտադրողների կողմից մի փոքր էլ ուռճացվում է, որ որևէ դեպք բաց չթողնվի, բայց դրանք սարսափելի չեն և կարճ ժամանակում անցնում են։ Չէ՞ որ օտար մարմին ենք ներմուծում և այդպիսի ռեակցիայի պետք է սպասենք։ Ավելի ուրախացնող հանգամանք է, որ վերջապես օրգանիզմը ճանաչեց անտիգենը և դրան պատասխան ռեակցիա տվեց»։

Սահակյանը նշեց, որ սրանք սպասվող ռեակցիաներ են, իսկ անսպասելի ռեակցիաները հիմնականում պայմանավորված են օրգանիզմի առանձնահատկություններով։

«Այսինքն հենց կոնկրետ պատվաստանյութը կարող է դեր չկատարել։ Անաֆելակտիկ շոկը այդ շարքի ռեակցիաներին է պատկանում, որ օրգանիզմը բուռն ռեակցիա է տալիս։ Այդպիսի ռեակցիա կարող է առաջանալ մեզ համար «անշառ» թվացող ասպիրինից։ Ջուրը ինքը ևս կարող է այդպիսի ռեակցիա առաջացնել, եթե մեծ չափերով մարդն օգտագործի»։

Մասնագետը տեղեկացրեց, որ նման դեպքերում ուսումնասիրվում են պատճառահետևանքային կապերը։ Սահակյանը տեղեկացրեց նաև, որ մինչև այսօր օգտագործվել է 20 մլն-ից ավելի «AstraZeneca» ընկերության պատվաստանյութ, գրանցվել է 7 տրոբմբոէմբոլիա և մոտ 18 գլխուղեղի սինուսային տրոմբոէմբոլիա։

Աղբյուր` Փաստինֆո