Փաստ ինֆո

«Փաստինֆո»-ի տեսանյութը անհետ կորած զինծառայող Վարդան Ադոյանի ընտանիքի ֆինանսական դժվարությունների մասին մեծ արձագանք է ստացել։ Մի շարք անձինք ու կազմակերպություններ են պատրաստակամություն են հայտնելով օգնել ընտանիքին՝ հաղթահարելու խնդիրները, որոնց հետեւանքով կանգնել էին տունը կորցնելու վտանգի առաջ։

24-ամյա Մարիամի ամուսինը՝ Վարդան Ադոյանը պատերազմի հետևանքով անհետ կորած է համարվում։ Մարիամը 2,5 տարեկան դստեր հետ ապրում է հիփոթեքային վարկով ձեռք բերված տանը։ Ճիշտ է, այն ձեւակերպված էր հենց անհետ կորած զինվորի անունով, սակայն բանկերը նրա ընտանիքից պահանջում էին կատարել վարկային պարտավորությունները:

«Փաստինֆո»-ի տեսախցիկը ֆիքսել էր նաև, որ Մարիամը փոքր դստեր հետ ապրում էր «համեստ պայմաններում», որի տան տանիքն անգամ վերանորոգման կարիք ունի

Վարդան Ադոյանի մայրը՝ Անահիտ Ադոյանը «Փաստինֆո»-ին հայտնեց, որ հրապարակումից հետո բարերարներ են այցելել, չափագրել բնակարանի տանիքը, որպեսզի վերանորոգեն։

«Իրենք մոլիբդենի գործարանից էին։ VTB բանկի թղթերն էլ տարան, անգամ նամակը, որով հայտնում էին, որ եթե վճարումներ չլինի, տունը կառգրավվեն այդ թուղթն են նկարել»,- ասաց տիկին Անահիտը։

Տեսանյութին արձագանքել են նաև փաստաբանական ընկերությունից ու հայտնել, որ փաստաբանական աջակցություն կարող են տրամադրել, իսկ ընկերության տնօրենը հայտնել է, որ նաև դրամական աջակցություն կցուցաբերի։

«Ես ասացի, որ գումարի խնդիր չունենք։ Ես ինքս աշխատում եմ, ինչով հնարավոր է կօգնեմ Մարիամին, իսկ եթե կլինեն անձինք, ովքեր տան գույքի հարցում կարող են աջակցել երեխային, ապա խնդիր չի լինի»,- ասաց Անահիտ Ադոյանը։

«Փաստինֆո»-ն շնորհակալություն է հայտնում բոլոր այն անձանց, ովքեր պատրաստակամություն հայտնեցին աջակցել անհետ կորած զինվորի ընտանիքին՝ թեթևացնելու հոգսերը։

Աղբյուր` Փաստինֆո