Փաստ ինֆո

Հայաստանի ֆուտբոլի ազգային հավաքականի հարձակվող Յուրա Մովսիսյանի մորաքրոջը՝ ՀՀ աշխատանքի և սոցիալական հարցերի նախարարության ենթակայության տակ գործող Գյումրիի զբաղվածության տարածքային կենտրոնի տնօրեն Ամալյա Ադամյանին, մեղադրանք է առաջադրվել՝ նախնական համաձայնությամբ, կազմակերպված խմբի կողմից կաշառք ստանալու հատկանիշներով։ Ադամյանի պաշտպան Արմեն Թևանյանը «Փաստինֆո»-ի հետ զրույցում հայտնեց, որ նկատմամբ որպես խափանման միջոց է ընտրվել ստորագրությունը՝ չհեռանալու մասին։

Փաստաբանի փոխանցմամբ՝ մեղադրանքի հետ համաձայն չեն. ճիշտ է, չեն ժխտում, որ դեպքը եղել է, սակայն չեն ընդունում, որ դա նախապես խոստացած կաշառք է եղել։

«Հիմա Ձեզ էլ, եթե լավ են վերաբերում, շնորհակալություն եք հայտնում, չէ՞, այլ ոչ թե նախապես խոստացած կաշառք եք տալիս։ Իրավաբանական նուրբ հարցեր են»,- նշեց Թևանյանը։

Հիշեցնենք՝ ԱԱԾ-ն մարտի 23-ին հաղորդագրություն է տարածել՝ ՀՀ աշխատանքի և սոցիալական հարցերի նախարարության զբաղվածության պետական գործակալության Գյումրիի տարածքային կենտրոնի տնօրենի և նրան ենթակա աշխատակիցների կողմից առերևույթ կաշառք ստանալու և նրանց կաշառք տալու դեպքերի վերաբերյալ։ ԱԱԾ-ն հայտնել էր, որ ձերբակալվել են ընդհանուր թվով 9-ը անձինք, որոնցից 8-ը կին, այդ թվում՝ զբաղվածության տարածքային կենտրոնի տնօրենը, տեղակալը, ինչպես նաև նրանց ենթակայության ներքո գտնվող թվով 6-ը մասնագետները, ովքեր, բոլորը, այդ թվում՝ կենտրոնի տնօրենը, գործով ձեռք բերված անհերքելի փաստերի ճնշման ներքո, տվել են խոստովանական ցուցմունքներ և աջակցել են նախաքննական մարմնին կոռուպցիոն մեխանիզմի ամբողջական բացահայտման համար: Ձերբակալված անձինք ազատ են արձակվել, նրանց նկատմամբ որպես խափանման միջոց է կիրառվել ստորագրությունը՝ չհեռանալու մասին;

Փաստաբանը մեզ հետ զրույցում տեղեկացրեց, որ քրեական գործն ԱԱԾ քննչական դեպարտամենտից տեղափոխվել է ՔԿ Շիրակի մարզային քննչական վարչություն։

Դիտարկմանը, որ կասկածանքի շուրջ ցուցմունք տալիս Ադամյանը խոստովանական ցուցմունք է տվել, իսկ այժմ մեղադրանքի հետ համաձայն չէ, Թևանյանը նշեց, որ չեն հրաժարվում, որ դեպքը եղել է, բայց չեն ընդունում, որ դա նախապես խոստացած կաշառք է եղել։

Թևանյանը հայտնեց, որ ձերբակալությունից հետո ինքնախոստովանական ցուցմունք տվել է, որի մասին հետագայում պարզաբանումներ կտրվեն։

Հարցին՝ կարելի է արձանագրել, որ խախտվել է Ադամյանի պաշտպանության իրավունքը, թույլ չեն տվել, որ պաշտպան ներգրավվի, փաստաբանը նշեց, որ չի կարող ասել, որ խախտվել է պաշտպանության իրավունքը, քանի որ ձևակերպվել է այնպես, որ պաշտպան չի ուզում։ Իսկ թե ինչ ապացույցների հիման վրա է կազմվել ձերբակալման արձանագրությունը, ապա նաեւ մեղադրանքի որոշումը, փաստաբանը հայտնեց, որ տվյալները ձեռք են բերվել օպերատիվ միջոցառումների, օպերատիվ ձայնագրառման, գաղտնալսման արդյունքում։ Ինչ վերաբերում է Ադամյանի մասնակցությամբ առերես հարցաքննություններին, փաստաբանը հայտնեց, որ իր ներկայությամբ առերես հարցաքննություն չի եղել, բայց իր ունեցած տեղեկություններով՝ Ադամյանի մասնակցությամբ եղել է, իսկ թե գործով անցնող անձանցից ում հետ է եղել, փաստաբանը չմանրամասնեց։

Նշենք, որ մամուլում շրջանառվող լուրերի համաձայն՝ Ամալյա Ադամյանի ձերբակալությունը սերտ առնչություն ունի Ազգային ժողովի «Իմ քայլը» իշխող խմբակցության պատգամավոր Կարեն Սարուխանյանի հետ, քանի որ վերջինս ցանկանում է իր հորեղբոր որդուն՝ Արմեն Սարուխանյանին, նշանակել ապրիլի 1-ից օպտիմալացման արդյունքում ձևավորվող նոր կառույցի տնօրեն, որը ներառելու է նաև Զբաղվածության պետական գործակալությունը:

Ավելին՝ «Փաստինֆո»-ին նաև հայտնի դարձավ, որ Սարուխանյանին օրերս տեսել են ՔԿ Շիրակի մարզային քննչական վարչությունում, իսկ թե ինչ նպատակով է պատգամավորն այցելել քննչական, կարելի է միայն ենթադրել։

Փաստաբանը մեզ հետ զրույցում չբացառեց, որ Ադամյանի նկատմամբ իրականացվող հետապնդումը կարող է կապ ունենալ նշված հանգամանքի, ինչպես նաև՝ Ադամյանի ընդդմիադիր հայացքների հետ։

Հեղինակ՝ Իզաբել Սահակյան

Աղբյուր` Փաստինֆո