Փաստ ինֆո

Տևական ժամանակ իշխանության բարձրաստիճան տարբեր պաշտոնյաներ ակնարկներ են անում առ այն, որ տարածաշրջանում նոր իրավիճակ է ձևավորվել և պետք է «կորեկցիա» արվի Հայաստանի հարաբերությունները Թուրքիայի հետ։ Այս պահին Թուրքիայի հետ ինչ-որ բանակցություններ գնու՞մ ես։ ԱԺ արտաքին հարաբերությունների հանձնաժողովի նիստի ժամանակ այս հարցը բարձրացրեց ԱԺ «Բարգավաճ Հայաստան» խմբակցության քարտուղար Արման Աբովյանը՝ դիմելով ՀՀ ԱԳ նախարար Արա Այվազյանին։

ԱԳ նախարարն ասաց, որ հետևել է այդ հայտարարություններին. «Պետք է հիշեցնեմ, որ արտաքին քաղաքականության վերաբերյալ Հայաստանի պաշտոնական դիրքորոշումը հնչեցվում է ՀՀ վարչապետի և արտաքին գործերի նախարարի կողմից։ Հայ ժողովուրդը, որը վերապրել է 20-րդ դարի առաջին ցեղասպանությունը, թերևս ամենալավն է գիտակցում խաղաղության գինը։ Մենք չենք փնտրում թշնամիներ, Հայաստանի անկախացման առաջին օրվանից մինչև վերջերս Հայաստանը տարբեր նախաձեռնություններով է հանդես եկել Թուրքիայի հետ հարաբերությունների կարգավորման ուղղությամբ»,-ասաց ԱԳ նախարարը։

Արա Այվազյանը նկատեց՝ ինչպես միջանձնային, այնպես էլ միջպետական հարաբերություններում ամենակարևորը փոխադարձության սկզբունքն է. «Անցած դարի հայատյացությունը, որի գագաթնակետն էր հայոց ցեղասպանությունը, կարծես ոչ միայն չի դադարեցվել, այլև արտահանվել է մեր տարածաշրջանում։ Բոլորս շատ լավ գիտակցում ենք՝ ինչ հնարավորություններ ու հեռանկարներ կարող են ստեղծել խաղաղությունը և հաշտությունը, բայց որպեսզի իրապես խաղաղություն լինի մեր տարածաշրջանում, ակնկալում ենք, որ Թուրքիան արմատական փոփոխությունների կենթարկի Հայաստանի հանդեպ իր ագրեսիվ քաղաքականությունը և կվերացնի թշնամական գործողությունները»,-ասաց Արա Այվազյանը։

Արման Աբովյանի դիտարկմանը, որ Թուրքիան ոչ մի բան էլ չի վերանայի, որովհետև հակահայկական թեզն անկյունաքարային է նրանց մոտ, Արա Այվազյանն ասաց. «Չեմ կարծում, որ Թուրքիան երբեք չի փոխի հայատյացության իր կեցվածքը»։

Նախարարը հավելեց, որ ԱԳՆ-ն տեղյակ չէ որևէ ձևաչափի մասին, որում կարող են տեղի ունենալ խորհրդակցություններ, կոնսուլտացիաներ կամ բանակցություններ պաշտոնական Անկարայի հետ։

Աղբյուր` Փաստինֆո