Փաստ ինֆո

Մենք ունենք բոլոր հիմքերը մտածելու, որ այս անգամ իշխանությունը ևս կխաբի մեզ և չի անցկացնի ընտրություններ, - այսօր լրագրողների հետ զրույցում հայտարարել է ՀՅԴ ԳՄ ներկայացուցիչ Իշխան Սաղաթելյանը:

Ըստ նրա` արտահերթ ընտրությունների մասին Փաշինյանի հայտարարությունը շարժման արդյունքն է, բայց չեն կարող վստահ լինել, որ ընտրությունները տեղի կունենան:

«Երբ շարժումը թափ է հավաքել, Փաշինյանը հայտարարել է արտահերթ ընտրություններ անցկացնելու մասին, իսկ երբ շարժումը կորցրել է իր թափը, վարչապետը նշել է, որ ընտրությունների կարիքը չկա», - նշել է Սաղաթելյանն ու ավելացրել. «շարունակելու ենք մեր պայքարը, Փաշինյանը պետք է օր առաջ հեռանա»:

Ըստ նրա` հունիսի 20-ին ընտրություններ տեղի ունենալու համար անհրաժեշտ է, որ Փաշինյանը պետք է հրաժարական տա ապրիլի 22-ից մայիսի 7-ը ընկած ժամանակահատվածում:

«Իսկ, երբ Փաշինյանը հրաժարական տա, մենք ամեն ինչ անելու ենք, որ դե-յուրե հրաժարականը դառնա դե-ֆակտո: Այսինքն` պետք է այնպես անենք, որ նա ժամանակավոր պաշտոնակատար չլինի: Իսկ եթե ինչ-ինչ պատճառներով դա մեզ չհաջողվի, մենք կմտածենք ընտրություններին գնալու մասին»,- շեշտեց Սաղաթելյանը:

ՀՅԴ ԳՄ ներկայացուցչի դիտարկմամբ` Փաշինյանն այս ընտրությունները դիտարկելու է, որպես իր կաշին փրկելու հնարավորություն:

«Մենք պետք է ամեն ինչ անենք, դա թույլ չտալու համար: Եվ շատ կարևոր է, որ ընտրություններին մասնակցող ուժերը դա չդիտարկեն որպես սովարական ընտրություններ, այլ որպես Հայրենիքի փրկելու և դավաճաններից ազատվելու միջոց»,- ասաց նա:

Անդրադառնալով երեկվա ԱԽ քարտուղարի հայտարարությանը, թե Թուքիային թշնամի համարելու մոտեցումը պետք է «շտկվի», քանի որ տարածաշրջանում զարգացումներ են տեղի ունենում` Սաղաթելյանը նկատեց ՝ «Այսօր Հայաստանում իշխանության է եկել Թուրքիայի շահերը սպասարկող խմբավորում: Նրանք ծրագրավորված հանձնեցին Արցախը և հիմա անցել են իրենց գործողությունների երկրորդ մասին: Նրանք ուզում են, որ մենք մոռանանք և հրաժարվենք հայոց ցեղասպանությանը ճանաչելու օրակարգից, մոռանանք Արցախը և արցախյան պատերազմը, ուրանանք մեր պատմությունը: Սակայն մեր շարժումը պետք է պայքարի, որպեսզի դա տեղի չունենա: Եվ մեր տեսակը հաղթելու է: Ով մոռանա հայոց ցեղասպանությունը, Արցախը դա մեր ազգի թշնամին է:

Շատ կոշտ արձագանք լինելու է նաև Սփյուռքից: Քանի որ Սփյուռքում մեր հայրենակիցները և կառույցները շատ հիասթափված են այսօրվա իշխանությունների գործելաոճից»,- եզրափակեց Սաղաթելյանը:

Մանրամասները` տեսանյութում:

Աղբյուր` Փաստինֆո