Փաստ ինֆո

Այսօր մեր ազգը պետք է վեր հառնի մոխիրներից, իսկ դրա փոխարեն մենք քննարկում ենք օրակարգ ՝ թե ինչպես հնարավորինս շուտ դառնանք թուրկական վիլայեթ։ Այս մասին «Փաստինֆո»-ի հետ զրույցում ասել է քաղաքագետ Թեւան Պողոսյանը:

Նա ընդգծել է, որ թուրքը եղել է եւ մնում է մեր թշնամին, դա դարերից է գալիս։ «Մինչեւ թուրքերը չճանաչեն հայոց ցեղասպանությունը ես չեմ տեսնում հայ-թուրքական հարաբերություններում որեւէ նորմալացման հնարավորություն։ Թուրքերը նաեւ պետք է փոխհատուցում հատկացնեն հայերին` ցեղասպանության համար։ Նաեւ կան մեր պապական հողերի խնդիրները եւ մեր պատմական ժառանգության խնդիրները։ Իսկ մինչ այդ, եթե ինչ-որ մարդիկ ցանկանում են ընդունել թուրքական հպատակությունը կարող են տեղափոխվել Թուրքիա։ Այսօր Հայաստանը կաթվածահար իրավիճակում է եւ ես ցավում եմ, որ մենք ունենք այս պարտված իշխանությունը», - նշել է քաղաքագետը։

Թ.Պողոսյանը կարեւորել է գործող իշխանությունների օր առաջ հեռանալը եւ քաղաքական պատասխանություն ենթարկվելը` իրենց գործողությունների համար։

«Ասեմ ավելին, 2018 թվականին իշխանության նախընտրական ծրագրում խոսք չի եղել Թուրքիայի հետ հարաբերությունների սերտացման մասին։ Իշխանությունն իրենք ստացել են իրենց նախընտրական խոստումները կյանքի կոչելու համար, իսկ Թուրքիայի հետ հարաբերությունների մասին խոսք չի եղել։ Նրանք պետք է օր առաջ հեռանան,- շեշտել է Պողոսյանը։

Նկատենք որ երեկ ՀՀ Անվտանգության խորհրդի քարտուղարը Հ1-ի հետ հարցազրույցում ասել է, որ Հայաստանը պետք է վերանայի Թուրքիայի հետ իր հարաբերությունները, Թուքիային թշնամի համարելու մոտեցումը պետք է «շտկվի», քանի որ տարածաշրջանում զարգացումներ են տեղի ունենում:

Հեղինակ՝ Անի Մշեցյան

Աղբյուր` Փաստինֆո