Փաստ ինֆո

Ես մեկնաբանելու առանձնապես ոչինչ չունեմ, ՍԴ-ն իրականացնում է օրենքով և Սահմանադրությամբ իրեն վերապահված գործառույթները: Թե ինչքա՞նով է իր ընդունած որոշումը համապատասխանում օրենքին և սահմանադրությանը, ես չեմ կարող մեկնաբանել, քանի որ իրավաբանական հարուստ գիտելիքներ չունեմ: Ինձ ավելի հետաքրքիր է քաղաքական կոմպոնենտը, իսկ այս առումով ես ոչ մի խնդիր, ոչ մի անհանգստություն չունեմ: Այս մասին «Փաստինֆո»-ի հետ զրույցում ասաց իմքայլական պատգամավոր Հովիկ Աղազարյանը՝ անդրադառնալով ՍԴ-ի՝ ՀՀ քրեական օրենսգրքի 300.1-րդ հոդվածը հակասահմանադրական ճանաչելու որոշմանը:

«Հեղափոխությունից հետո ես այն համոզմանն էի, որ մենք հեղափոխությունը պետք է հասցնենք տրամաբանական ավարտին: Դա այն է, որ ժողովուրդը փոխել է օրենսդիր և գործադիր իշխանությունները, իսկ դատականը մնացել է անփոփոխ, հետևաբար, մենք պետք է հեղափոխական տրամաբանությամբ վիրահատական մեթոդներով առաջնորդվեինք նաև դատական համակարգում: Այս տեսակետը իմ գործընկերների մոտ չի արժանացել հավանության, և չեմ էլ կարող ասել, թե իմ տեսակետը ճի՞շտ էր, թե՞՝ սխալ էր»,-ասաց Աղազարյանը:

Իմքայլական պատգամավորը վստահեցնում է, որ իրենց նախաձեռնած օրենսդրական փոփոխություններին արդյունքում 6-8 ամիս հետո Հայաստանն ունենալու է ամենակայացած դատական համակարգերից մեկը՝ նույն ՍԴ դատավորների կատարմամբ.

«Բոլորին ակնհայտ է, որ դատական համակարգ բացարձակ անկախության մեջ է գտնվում գործադիր և օրենսդիր իշխանություններից, ինչը շատ լավ է, բայց, ցավոք սրտի, դատական համակարգի շատ ներկայացուցիչներ գտնվում են ուղիղ կախվածության մեջ նախկին իշխանավորներից, պաշտոնյաներից և քրեական ենթամշակույթի ներկայացուցիչներից: Մենք, որպես պատգամավորներ, կամաց-կամաց պետք է հասնենք այն վիճակին, որ այդ կախվածության աստիճանը փոքրացնենք, այդ ժամանակ կունենանք շատ լուրջ և կայացած դատական համակարգ»,-ասաց Աղազարյանը:

Հարցին՝ ինչպե՞ս է գնահատում, որ հենց իրենց իշխանության օրոք ձևավորված ՍԴ-ն է նման որոշում կայացրեց, պատգամավորն արձագանքեց

«Չշտապենք այդպիսի գնահատականներ տալ, որովհետև , չնայած իմ համեստ իրավաբանական գիտելիքներին, այնուհանդերձ, այս կամ այն արարքը, որը դիտարկվում է որպես օրենքների, Սահմանադրության խախտում, տարբեր որակումներ կարող է ունենալ և չի բացառվում, որ մեղադրող կողմը փոխի համապատասխան իրավական ձևակերպումները և այլ բանով հանդես գա։ Մենք չպետք է այս երկու բանը շփոթենք, չնայած ինձ դա բացարձակ չի հետաքրքրում, ինձ հետաքրքրում է ժողովրդի կարծիքը, որն ամփոփվում է ընտրությունների ձևով: Իմ պարտավորությունը կայանում է նրանում, որ իմ համեստ նպաստը բերեմ արդար, թափանցիկ, անկաշառ ընտրություններ անցկացնելուն, իսկ մյուս բաները, թե Ռոբերտ Քոչարյանը կլինի ճաղերի հետևում ու իրեն այնտեղից կթվա՝ մենք բոլորս ենք ճաղերի հետևում՝ ինձ համար երկրորդական է»,-ասաց Աղազարյանը:

Դիտարկմանը՝ թե հենց Նիկոլ Փաշինյանը նպաստեց ոչ միայն Ռոբերտ Քոչարյանի՝ քաղաքականություն վերադառնալուն, այլ նաեւ վարկանիշի բարձրացմանը՝ պատգամավորը վստահեցրեց, որ դա կերևա արտահերթ ընտրությունների արդյունքում.

«Եթե Ռոբերտ Քոչարյանի վարկանիշը բարձրացած է, և մեր կողմից կազմակերպված արդար, մաքուր ընտրությունների արդյունքում Քոչարյանը իր թիմով կարձանագրի այս կամ այն նշաձողը ժողովրդի թափանցիկ քվեարկության, անձամբ ես դրա տերն եմ, բայց կարծում եմ, որ այդպիսի բան չի լինի»,-ասաց Աղազարյանը:

Պատգամավորը կարծում է, որ Ռոբերտ Քոչարյանը որևէ լուրջ շանս չունի՝քաղաքական կյանքում ակտիվ դերակատարություն ունենալու.

«Ինքը պասիվ դերակատարություն միշտ էլ ունեցել է, բայց ակտիվ դերակատարություն ունենալու ոչ մի շանս չունի, որովհետև ընտրողը բոլորին բավականին լավ ճանաչում է»,-ասաց Հովիկ Աղազարյանը:

Աղբյուր` Փաստինֆո