Փաստ ինֆո

ՀՀ Սահմանադրական դատարանը հրապարակել է ՀՀ քրեական օրենսգրքի 300.1-րդ հոդվածի սահմանադրականության հարցով որոշումը՝ արձանագրելով, որ հոդվածը հակասում է Սահմանադրությանը։ ՍԴ բակում լրագրողների հետ զրույցում ՀՀ երկրորդ նախագահ Ռոբերտ քոչարյանի փաստաբան Արամ Վարդևանյանը նշեց, որ ՍԴ որոշմամբ՝ արդեն իսկ բոլոր ակտերը, որոնք վերաբերում են հոդվածին, ընդունման պահից ի վեր ուժ չունեն և ենթակա են վերանայման։

Անդրադառնալով Ռոբերտ Քոչարյանի և մյուսների գործով դատավոր Աննա Դանիբեկյանի հնարավոր դիմադրությանը,  իրավապաշտպանը նշեց, որ  քրեական հետապնդումը դադարեցնելու է։

Հարցին՝ կարո՞ղ է դիմադրել դատավոր Աննա Դանիբեկյանը, իրավապաշտպանը կրկնեց՝ քրեական օրենսգրքում այլևս չկա 300.1 հոդված.
«Եթե չկա հոդված, չկա հանցանք։ Սա է քրեական օրենսգրքի պարզ տրամաբանությունը»։

Վարդևանյանը տեղեկացրեց, որ փաստաբանական թիմով կներկայացնեն համապատասխան միջնորդությունը, գործողությունները մանրամասն կներկայացնեն՝ հանդես կգան հայտարարությամբ։

«Քրեական դատավարության օրենսգիրքը պաշտպանական կողմի վրա նման պարտականություն պարզապես չի դնում, սա նաև մեղադրանքի կողմի պարտականությունն է, որտեղ կա հանգամանք, որով արդեն իսկ փաստում է, որ քրեական օրենսգրքում 300.1-րդ հոդված գոյություն չունի»։

Հարցին՝ Ռոբերտ Քոչարյանը նաև կաշառք ստանալու համար է մեղադրվում, փաստաբան ասաց, որ այդ հոդվածի վերաբերյալ նույնիսկ նախաքննական փուլում հիմնավոր կասկածը չէր հաստատվել, որը Վճռաբեկ դատարանն էլ վարույթ չէր ընդունել՝ որևէ խնդիր չէր տեսել։

«Բոլորիս ուզում եմ շնորհավորել։ Ի վերջո ապօրինությունը որևէ մեկի շահերից չի կարող բխել, որովհետև անարդարությունը ի վերջո սպառնալիք է արդարությանը և այս անարդարությունն ավարտվեց»,- եզրափակեց իրավապաշտպանը։

Աղբյուր` Փաստինֆո