Փաստ ինֆո

ԲԴԽ անդամ Գագիկ Ջհանգիրյանի և Նիկոլ Փաշինյանի օգնական Աննա Վարդապետյանի հանդիպումների վերաբերյալ որևէ վարույթ դեռևս չկա, Ջհանգիրյանի գործողությունները դեռևս քննարկման առարկա չեն դարձվել։ 

Ավելի վաղ «Փաստինֆո»-ն, հղում կատարելով սեփական աղբյուրներին, հայտնել էր, որ ՀՀ վարչապետ Նիկոլ Փաշինյանի օգնական Աննա Վարդապետյանը վերջին մեկ ամսում երեք անգամ այցելել է Բարձրագույն դատական խորհուրդ և հանդիպումներ ունեցել ԲԴԽ անդամ Գագիկ Ջհանգիրյանի հետ։ Հանդիպման ընթացքում նրանք քննարկել են տարբեր գործերով կալանքի հարցեր, որոնցով Վարդապետյանի հեռանալուց հետո սկսել է հետաքրքրել Ջհանգիրյանը։

«Փաստինֆո»-ի տեղեկությունները հաստատվել են նաև դատական դեպարտամենտից փաստաբան Ամրամ Մակինյանի հարցմանն ի պատասխան տրված պաշտոնական փաստաթղթում, որը երեկ հրապարակել է փաստաբան Ամրամ Մակինյանը։ Ըստ այդմ՝ Աննա Վարդապետյանը Գագիկ Ջհանգիրյանին այցելել է փետրվարին, բայցի այդ նա հանդիպումներ է ունեցել նաեւ ՀՀ ՔԿ քննիչների հետ, որոնց վարույթում են քննվում Սյունիքի համայնքապետերի վերաբերյալ քրեական գործերը։ Փաստաբան Մակինյանն ԱԱԾ ուշադրությունն է հրավիրել այս հանգամանքի վրա՝ առաջարկելով պարզել, թե ԲԴԽ անդամն ինչ քրեական գործեր էր ուղղորդում Աննա Վարդապետյանի և քննիչների հետ հանդիպելիս։ Հատկանշական է, որ Աննա Վարդապետյանի կողմից Ռուբեն և Ռաֆիկ Հայրապետյանների գործով արդարադատությանն առերևույթ խոչընդոտելու փաստի առթիվ այժմ ԱԱԾ-ում նյութեր են նախապատրաստվում։

Սակայն ԲԴԽ-ն կարծես իր ներկայացուցչի վարքագիծը դեռ շտապում քննարկման առարկա դարձնել։ «Փաստինֆո»-ի հետ զրույցում ԲԴԽ անդամ Գրիգոր Բեքմեզյանը հայտնեց, որ այդ հարցի վերաբերյալ որևէ վարույթ չկա, որևէ քննարկում չի եղել։

Իսկ թե արդյոք Ջհանգիրյանի գործողությունները քննարկման առարկա չեն դարձնելու՝ Բեքմեզյանը նշեց, որ չի մտածել այդ ուղղությամբ, ԲԴԽ անդամները պարբերաբար տարբեր մարդկանց հետ հանդիպում են, չի կարող նույնիսկ մտածել, որ այդ հանդիպումներն ինչ -որ սխալ նպատակներ ունի։

Ի պատասխան հարցին, թե արդյոք Գագիկ Ջհանգիրյանը ԲԴԽ է գործուղվել՝ կոնկրետ գործերով դատավորների վրա ճնշում գործադրելու կամ գործընթացն ավելի համակարգված դարձնելու համար, Բեքմեզյանը նշեց, որ որևէ ԲԴԽ անդամ որևէ կերպ չի կարող դատավորների նկատմամբ ճնշում գործադրել, որովհետև ԲԴԽ-ն կոլեգիալ մարմին է և որևէ անդամի կամքից որևէ բան չի կարող տեղի ունենալ։

«Ես բացառում եմ նման բան, որ ինչ- որ ԲԴԽ մեկ անդամ կարող է դատավորների նկատմամբ ճնշում գործադրել»,- նշեց Բեքմեզյանը։
Հարցին՝ արդյո՞ք բացառվում է նաև Աննա Վարդապետյանի հետ հնարավոր համագործակցությունը, քանի որ բոլորովին վերջերս բավականին աղմկահարույց տեսանյութ էր տարածվել և այժմ ԱԱԾ-ում նյութեր են նախապատրաստվում, Բեքմեզյանը նշեց, որ դեռևս նյութեր են նախապատրաստվում և ինքը չի կարող մարդկանց անմեղության կանխավարկածը կասկածի տակ դնել, քննությունն ամեն ինչ ցույց կտա։

Հեղինակ՝ Իզաբել Սահակյան

Աղբյուր` Փաստինֆո