Փաստ ինֆո

Արցախի ժողովուրդը միշտ կողմնակից է եղել Ռուսաստանի հետ հարաբերությունների սերտացմանը, այնտեղ նաև քննարկման թեմա է դառնում ընդհուպ Արցախը Ռուսաստանին միանալու հետ կապված հարցը, - «Փաստինֆո»-ի հետ զրույցում ասել է ՀՀ ԱԺ «Իմ քայլը» պատգամավոր Ալեքսեյ Սանդիկովը։

Ինչպես նշել ենք՝ Արցախում ռուսերենը երկրորդ պետական լեզու է հռչակվել, որի մասին օրինագիծն Ազգային ժողովի կողմից արդեն ընդունվել է։

«Հաշվի առնելով վերջին զարգացումները և Արցախում ռուսական կոնտինգենտի ավելացումը ՝ ի դեմս ռուս խաղաղապահների, նաև հաշվի առնելով Ռուսաստանի դերի մեծացումը տարածաշրջանում, կարծում եմ արցախցիներն իրենց պատգամավորների միջոցով կատարել են իրենց ընտրությունը: Եվ ես ողջունում եմ այդ որոշումը», - ասել է պատգամավորը:
Ըստ նրա՝ Արցախը միշտ էլ կողմնակից էր Ռուսաստանի հետ հարաբերությունները սերտացնելուն ՝ թե քանակական, թե որակական իմաստով:

«Ես այստեղ որևէ անտրամաբանական և արտառոց բան չեմ տեսնում: Նույնիսկ պատերազմի ժամանակ Արցախի նախագահը նամակով էր դիմել Ռուսաստանի նախագահ ՝ Վլադիմիր Պուտինին՝ միջնորդելու և միջամտելու խնդրանքով: Արցախի ժողովուրդը միշտ կողմնակից է եղել Ռուսաստանի հետ հարաբերությունները սերտացնելու հարցում: Այնտեղ նաև քննարկման թեմա են դառնում հարաբերություններն ավելի սերտացնելու հետ կապված հարցերը ՝ ընդհուպ Արցախը Ռուսաստանին միացնելու հետ կապված: Իհարկե ոչ բոլոր քննարկումներն են իրականությանը համապատասխանում,բայց, կարծում եմ, դիսկուրսը հիմնականում պարզ է», - նշեց նա:

Արդյո՞ք սա նշանակում է, որ Հայաստանը եւս պետք է Արցախի օրինակով մտածի ռուսերեն լեզվի կարգավիճակը բարձրացնելու մասին ՝ պատգամավորը արձանագրեց, որ դրա համար չկա խիստ անհրաժեշտություն։

«Պետք չէ մոռանալ, որ մենք մոնոէթնիկ պետություն ենք, և ռուսերենը Հայաստանում լայն տարածում ունի: Ես կողմնակից եմ, որ և ռուսերենը, և անգլերենը լայն տարածում ունենան մեր երկրում: Բայց, հաշվի առնելով մեր երկրի տարբեր ինտեգրացիոն միավորումներում լինելը ՝ ԵԱՏՄ-ն և ՀԱՊԿ-ն, ես գտնում եմ, որ ռուսերենի դերը և լեզվի իմացությունը մեր քաղաքացիների կողմից պետք է աճի: Եվ ռուսերենը պետք է լայն տարածվածություն ունենա Հայաստանում», - շեշտեց Սանդիկովը:

Անի Մշեցյան

Աղբյուր` Փաստինֆո