Փաստ ինֆո

«Ընտրական օրենսգրքի» փոփոխությունների վերաբերյալ նախագիծը շրջանառության մեջ է դրվել։ Այն նաև ուղարկվել է Վենետիկի հանձնաժողով և առաջիկայում նրանց կարծիքը կունենանք։ Այս մասին ճեպազրույցի ժամանակ ասաց ԱԺ «Իմ քայլը» խմբակցության պատգամավոր Հայկ Կոնջորյանը՝ հավելելով, որ ակտիվ քննարկումների հետ են ինչպես միջազգային կառույցների, այնպես էլ քաղաքական կուսակցությունների, խորհրդարանական և արտախորհրդարանական ուժերի հետ։

Պատգամավորը նշեց, որ ԸՕ փոփոխության հարցը եղել է իրենց քաղաքական հանձնառությունը, ինչին հավատարիմ են մնում այսօր․ «Քաղաքացիների մոտ կարող է տպավորություն առաջանալ, որ ԸՕ փոփոխության գլխավոր կամ միակ փոփոխությունն ընտրակարգն է, սակայն նախատեսվում են նաև բազմաթիվ այլ փոփոխություններ։ Քանձնառություն ենք ունեցել, որ պետք է անցում կատարենք համամասնական ընտրակարգի և այդ որոշումը կայացվել է»,-նշեց պատգամավորը՝ հավելելով, որ շարունակվում են նաև Վենետիկի հանձնաժողովի հետ իրենց քննարկումները։

Հարցին՝ միայն վարկանիշային ցուցակնե՞րն են հանում, թե՞ ամբողջ օրենսգիրքն են փոխելու, պատգամավորը նշեց, որ շրջանառության մեջ են դրել նաև ֆինանսական թափանցիկության և մի շարք այլ հարցեր, որոնք պատգամավորի վստահեցմամբ բերելու են ԸՕ-ի բարելավմանն ու ազատականացմանը։

Դիտարկմանը, որ ԱԺ «Լուսավոր Հայաստանը» դեմ է այս փոփոխությանը, Հայկ Կոնջորյանը նկատեց՝ եթե ԸՕ-ն փոփոխության ենթարկվի, ապա խաղի կանոնները կպարզեցվեն․ «Խոսքը գնում է վարկանիշային ընտրակարգը հանելու մասին, ինչի արդյունքում խաղի կանոնները ոչ թե բարդանում, այլ պարզեցվում են։ Սա կոնսեսուսի է արժանացել առնվազն արտախորհրդարանական ուժերի, քաղհասարակության կողմից։

«Բարգավաճ Հայաստան»-ի կողմից էլ նշվել է, որ իրենց համար ընտրակարգի փոփոխությունը մեծ հաշվով խաղի կանոնների փոփոխություն չէ և միևնույնն է։ Չեմ կարծում, որ ԸՕ-ի փոփոխությունները կհանգեցնեն խաղի կանոնների այնպիսի փոփոխութան, ինչը քաղաքական միավորների համար խնդիրներ կառաջացնի»,-նշեց պատգամավորը։

Աղբյուր` Փաստինֆո